「12瞞逃」先喺香港涉嫌犯下「重罪」，繼而潛逃事敗喺內地海域俾內地海警截獲同拘捕，呢件案本來就係清清楚楚、明明白白，佢哋當中十人因為偷越邊境相關罪行被判監，合情合理。不過，香港嘅攬炒派政客以至「瞞逃」家屬，似乎就始終都要將事件政治化、玩扣帽子；囍雨睇新聞，仲有「瞞逃」家屬話各人被判坐監係「冤獄」，稱「大陸無論判一日或者七個月，每一日都係冤枉㗎」。囍雨真心想問，「瞞逃」們罪證確鑿，到底「冤」從可來？

在港在內地 都涉違法！

先講潛逃事敗呢筆，不論係組織他人偷越邊境罪，定係偷越邊境罪，都唔係今日先有或者為「瞞逃」而設嘅罪名，「12瞞逃」想由水路潛逃台灣，喺內地海域俾內地海警捉到，依法扣押、審訊同判刑，囍雨睇唔到邊度有「冤」；退一步講，如果真係「冤」獄，應該唔會輕判十名「瞞逃」，而係將佢哋刑期提高，以阻嚇其他人潛逃。

至於喺香港，一個正常人唔會無端端「畏罪潛逃」，睇返新聞報道，原來「12瞞逃」個個都涉嫌犯下嚴重罪行，有人涉嫌觸犯《港區國安法》、企圖縱火罪，呢啲都可能係可以判處終身監禁嘅罪行。其他人涉嫌嘅罪行亦「包羅萬有」，包括暴動、襲警、串謀意圖危害生命而縱火罪、管有攻擊性武器及無牌管有槍械罪，甚至連涉及製造爆炸品罪都有。囍雨覺得奇怪，點解「瞞逃」家屬以至政客出嚟咁多次，似乎無一兩個會話「瞞逃」喺香港涉嫌犯罪，「罪行滔天」呢？

這是愛 還是害？

關心、愛護子女以至其他年輕人，當然可以，甚至好重要，但關愛都係講原則嘅，如果我哋眼見年輕人做錯事，我哋用嘅方法唔係去指正佢，而係「千方百計」諗辦法包庇同縱容佢哋，囍雨想問，咁係對年輕人好咩？又或者，社會上其他年輕人見到犯錯係會得到包庇同袒護，又會唔會有樣學樣？「12瞞逃」俾我哋嘅啟示，在於年輕人犯錯，我哋應該即刻指正佢哋，以免佢哋「一錯再錯」，如果我哋唔能夠及時指出佢哋嘅錯誤，而佢哋又繼續犯錯，咁可能就恨錯難返喇！

依家十名「瞞逃」喺內地受刑，佢哋受完刑返香港要面對返本身嘅審訊，囍雨只能夠講一句，早知今日，何必當初。 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk