大家不妨估下，按照政客、家屬嘅「創作與想像」，「12瞞逃自動送中」嘅劇情會唔會大致係咁：內地警方當日設局越境拉人，然後嚴刑逼供、秘密審訊，繼而用「擇日宣判」無了期拖延放人日期、施以政治迫害；如果其中有人已經涉違國安法，咁對唔住，罪加一等！等住「將黑獄坐穿」吧…

如果真係咁，廣男就喺度諗，今日深圳法院對「12瞞逃」嘅判決，會唔會令有啲人大跌眼鏡甚至「大失所望」呢？

深圳鹽田法院今日上午對涉嫌偷越邊境嘅「12瞞逃」案正式宣判，其中10人被判監7個月至3年不等。根據內地官方公告，對於「組織他人偷越邊境」嘅鄧棨然、喬映瑜，分別判處有期徒刑3年、罰款2萬元人民幣，以及有期徒刑2年、罰款1.5萬元人民幣；至於「偷越邊境」嘅李宇軒、鄭子豪、嚴文謙等8人，就判處有期徒刑7個月、罰款1萬元人民幣。而另外兩名未成年人士黃臨福和廖子文，內地檢方決定不予起訴，即日移交香港警方。老實講 ，廣男認為呢個判決，對果啲一直利用事件販賣恐中嘅人，係一記「靚抽」！

依法辦事 何來「迫害」？

點解咁講？首先，內地法院今次開庭審案，好明確只係針對有人偷越邊境呢件事，至於12個人之前喺香港犯過咩事、涉嫌咩罪，甚至身負幾嚴重嘅控罪都好，唔係內地法院要處理嘅嘢，亦唔係量刑要考慮嘅因素，更加唔會干預自己司法管轄權以外嘅事。其次，既然有人犯罪係事實，涉案眾人亦都認罪，就必須負上相應刑責，但與此同時，依法該從寬就從寬、該減刑就減刑，內地法院唔會因為有港人或者「外國人」就給予「特權」，但亦都唔會因為有人趁機大肆攻訐抹黑就「司法報復、政治迫害」。再者，對於有未成年犯法，依法給予人性化對待，體現「教育為主懲為副」嘅精神，咁大家認為，內地司法又係咪如一啲反中政客所講嘅「不公不義」呢？

客觀看待、尊重內地法治

今日判決之後，「12瞞逃」案係咪可算告一段落？廣男難以預料，但依家再回過頭睇番成件事，呢件事從發生之日起，因為敏感嘅涉案背景、時間節點，可能一開始就註定被強加濃重嘅政治色彩，但廣男想講，當「有心人」不斷借機炒作「送中」、煽動反中時，大家又有冇嘗試放下自己嘅有色眼鏡，用一個客觀嘅態度去了解、去尊重內地嘅法治？如果我哋自己都選擇事事以政治「蒙蔽雙眼」，咁存心營造恐懼嘅人，當然有機可乘！

原圖：大公、深圳鹽田法院

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk