即將走過2020，有啲咩係最值得你回顧與銘記？唔同人會有唔同感受；每到臨近年尾，好多媒體都會推出精心大製作，將過去一年嘅重大事件與大家「重頭走過」。囍雨今日見到，攬炒派喉舌《生果報》亦都不例外，推出咗一個以「國安家亡」為主題嘅「2020回顧」；單睇標題，大家可能都估到，呢一系列圖文並茂嘅「精心策劃」，又係衝住反中反國安法而嚟，但囍雨睇完之後其實想講句，今時今日，咁嘅「回顧」未夠㗎！如果要講國安法，《生果報》點解又唔幫大家回顧下，香港因為何事要落實、執行國安法？

係生果報筆下，將《港區國安法》妖魔化為「嚴刑與峻法」，早已經唔係咩新鮮事；今日呢個「回顧篇」，大抵係想「加多幾錢肉緊」，同大家宣揚：嗱！你哋睇下，喺國安法之下，「萬世不朽的民主與自由2020年沒有來卻先告終」，因為國安法將香港人嘅自由「一劍封喉」，可以「以言入罪、未審先判、胡亂搜捕」；甚至有「700政治犯」被清算，繼而「香港人在國際眼中的新身份，是流亡者與難民」，結果就係「國家認為安全了，香港人的家卻已是亂作一大團」…

可有危害國安的「自由」？

唔知大家點睇呢？囍雨就覺得，既然我哋要記錄一頁關於2020年呢歷史，就一定唔可以只有《生果報》嘅一面之詞！

囍雨成日都講，如果香港冇黑暴分子打砸搶燒、殺人放火，冇人搞分裂國家，冇人勾結外國勢力危害國家安全，香港都未必需要動用到國安法呢把利劍；如果話上述種種都叫「民主、自由」，咁抱歉，恕囍雨不能苟同！大家要諗下，真正將香港搞到亂嘅，究竟係咩人。換個角度，如果從國家層面，對於香港已成事實嘅混亂局面都不管不理，又講唔講得通呢？由得香港被人攬炒都唔出手先叫「一國兩制、港人治港」？！民主與自由，係好重要，囍雨冇異議，咁國家安全呢？又重唔重要？講到國安法，全世界好多地方都有，而且早過香港，甚至執行上嚟嚴厲過香港，《生果報》又唔幫大家回顧下？又唔講呢啲地方「民主與自由告終」？

黃之鋒等不是「政治犯」！

再者，喺黑暴運動出現之前，香港法治一向廣受讚譽；國安法落實之後，已收立竿見影之效，現時黑暴已幾近絕跡就係最佳例證，囍雨會認為，呢啲都正正係香港法治、安全不斷健全嘅表現！有法可依，就必然會有違法必究，何來如《生果報》所言叫「清算政治犯」？尤其大家可以留意下，《生果報》甚至將煽惑他人包圍警總嘅黃之鋒、林朗彥以及周庭，都當做「政治犯」嘅「例子」，咁不如反問下，世界上又有冇煽惑包圍警總、而且自己都認罪嘅「政治犯」呢？

最後，囍雨仲想講多兩句關於《生果報》所提及嘅「港人流亡」問題，其實囍雨唔係好明，究竟咩叫「流亡」呢？係好似羅冠聰咁「先著草、後眾籌」，然後勾結外國勢力制裁香港？抑或好似許智峯咁身負「三案九罪」潛逃海外、仲涉嫌「先眾籌、後走佬」？定係好似張崑陽、梁頌恆等，只要「覺得自己可能有事」就急急腳出走？連自己責任都唔肯承擔嘅人，仲好意思攞「流亡」兩個字當光環？

《港區國安法》嘅實施，的確係香港2020年嘅一件大事，囍雨自己就會用八個字去為佢做註腳：國若不安、家何以寧？

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk