曾被前黨友批評為「人格卑劣，毫無政治道德」嘅前立法會議員林卓廷，因為涉嫌披露受調查人身份，被廉署拘捕兼起訴；喺法庭外，林卓廷稱自己罪名係「鍥而不捨去追究7.21警黑勾結」，質疑律政司長鄭若驊和廉署「重新演繹」《防止賄賂條例》，又表示相信今次唔會係最後一次受「政治檢控」。囍雨覺得成件事好簡單，就係不論林卓廷要「追究」啲咩、指控邊個，前提係唔可以違法，林卓廷想轉移視線，改變唔到佢涉嫌違法嘅事實！

林乃前廉署調查員

如果大家有留意開林卓廷嘅新聞，會發現佢不時對外宣稱自己係前廉署人員，然後就「扮專家」說三道四。問題嚟喇，作為前廉署人員，林卓廷係咪唔知道《防止賄賂條例》中有條文，列明唔可以披露受查人身份呢？定係佢扮唔知道？依家就咁睇件事，佢確實係有罪嫌，咁點解佢可以「免被起訴」呢？

至於林卓廷稱律政司、廉署「重新演澤」法例，囍雨覺得上述講嘅條例，一般人可能唔知，但林卓廷作為前廉署人員，如果咁都唔知就令人驚訝；更重要嘅係，社民連成員吳文遠之前向外披露時任民政事務局常秘馮程淑儀「正受查」，經過審訊、上訴甚至終審被定罪兼判監，林卓廷又唔知？囍雨真心想問下，廉署幾時有重新演繹法例？

若不檢控林 就是雙重標準

用逆向思維去睇呢件案，如果相同或類似性質嘅吳文遠要告，但依家唔告林卓廷，會唔會先係政府「重新演繹」法例呢？成件事好簡單，就係林卓廷有冇犯法同法庭點睇；林卓廷作為一個政客，佢可以喺法庭外打「開口牌」，話俾人政治檢控甚至政治迫害，但如果佢咁理直氣壯，可以試下用呢個作為抗辯理由，到時睇下法庭接唔接受！

囍雨經常強調，不論何人，如果犯法，就要承擔罪責；如果涉嫌違法，就要被送上法庭受審，睇法庭點判決！林卓廷雖為政客、「反政府鬥士」，但好抱歉，佢唔會因為咁而有「免死金牌」。相反，囍雨覺得佢身為前廉署人員，如果真係知法犯法，絕對係「罪加一等」！不論係市民以至廉署人，都要睇清楚到底係咩人，依家喺度出盡力「拆散」香港法治同廉署個「招牌」。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk