對於《港區國安法》，有好多「走佬」政客都會以為，人已經走咗，就算警方以涉違《國安法》通緝佢哋，都完全「無用處」；喺呢度，廣男想講兩樣嘢，第一就係如果人唔返嚟香港，咁香港警方確實未必「捉」到佢哋，但如果有朝一日佢哋回港，可能會一落機就會被捕；第二就係今日有啲國家暫停同香港嘅引渡協議，如果他日恢復協議，佢哋隨時可以被引渡，又或者佢哋去到其他同香港有引渡協議嘅地方，都有可能被引渡。所以，當有消息傳出警方正通緝30名身處海外嘅港人，指佢哋都係涉嫌違反《港區國安法》時，廣男想指出，呢班人（部分為攬炒派政客）避得一時，又避得一世咩？

立法原意 身處海外都有罪責

睇返《港區國安法》第37條，列明「香港特別行政區永久性居民，或者在香港特別行政區成立的公司、團體等法人或者非法人組織，在香港特別行政區以外實施本法規定犯罪，適用本法」，換句話說，就算有人喺海外作出有違《國安法》嘅行為，例如許智峯去到歐洲高呼要「光復香港」，都係有相當大罪嫌，唔會因為「去咗外國就無事」。

睇返報道提及到嘅被通緝人士，包括許智峯、羅冠聰、梁頌恆以至鄭文傑等人，佢哋有個共同特點，就係去到外國，依然「支援」香港抗爭者或者打所謂嘅「國際戰線」，有啲人例如羅冠聰甚至明目張膽地勾結外國政客；廣男想講，佢哋到咗外國，唔一定安全，如果外國他朝有日同香港恢復引渡協議，咁佢哋點？又或者，如果有一日呢啲國家要同中國爭取嘅咩利益，佢哋會唔會「交人」俾番香港特區，都好難講下。

一輩子不回港嗎？

退一步講，就算佢哋喺外國「安然無恙」，係咪一世唔返香港呢？一世唔返自己成長嘅地方？逃避一世，以要打「國際戰線」麻醉自己？呢啲人要知道，今日國際社會仲對香港有啲關注，今日香港有支持者願意「課金」俾佢哋，但三年後、五年後又如何？逃避，解決唔到問題，而只係製造更多問題，許智峯涉嫌違《國安法》，就係製造更多問題嘅例子。

不論喺任何國家或者地區，分裂國家、勾結外國或境外勢力危害國家安全，都係不被容許嘅行為，美國、英國、德國甚至台灣如此著力「包庇」被通緝嘅人，可能係出於政治盤算，但如果要一直包庇其他國家或者中央政府嘅「叛國者」，根本就有違公義，表面上呢啲外國或境外勢力係打擊中國，實則都係危害緊中國嘅國家安全。 

圖片來源：RTHK、梁頌恆Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk