「咩話？法官畀佢保釋？你搞咩啊？佢一定會走佬㗎！兩個議員一個牧師又點啊？你扣留佢旅遊証件係無用㗎，走佬係唔會搭飛機架，懵人！」

以上一段電影對白，今日重睇，令好多人都產生共鳴，事緣涉嫌犯下欺詐罪、涉違《港區國安法》嘅《生果報》老闆黎智英，竟然成功向高等法院申請保釋，可以返屋企「過聖誕」。有唔少人批評，黎智英涉嫌干犯咁嚴重嘅罪行，有機會潛逃，仲俾佢保釋，唔怕佢「走佬」咩？囍雨就認為，法庭雖然定下被認為「頗辣」嘅保釋條件，但以黎智英嘅人力財力，要「走佬」係唔係無可能？

最簡單嘅例子，就係喺「12瞞逃」想潛逃台灣被內地海警捉到前，其實有唔少黑暴分子都成功從海路潛逃到台灣，呢啲可能只係黑暴運動當中嘅「無名小卒」；依家成功保釋嘅黎智英，財力勢力絕對冠絕成個攬炒派，如果佢要走，套用返電影對白，駛乜一定要搭飛機呢？

看看《國安法》條文

黎智英涉嫌觸犯嘅，其實係罪責極重嘅《港區國安法》，囍雨睇返相關條文，其中第42條就寫明，「對犯罪嫌疑人、被告人，除非法官有充足理由相信其不會繼續實施危害國家安全行為的，不得准予保釋」；囍雨用平常人或者較為淺白嘅意思去理解呢段條文，其實係話「除非個法官好相信被告唔會『再犯』，否則唔俾保釋」。老實講，黎智英不論在公開平台、網上平台甚至「親身行為」，罪嫌都相當重下，囍雨真心想問，法官依據咩判斷繼而相信「其不會繼續實施危害國家安全行為」？

退一步講，之前咁多人被法庭批准保釋後潛逃，除咗因為法庭之前嘅保釋條件寬鬆之外，香港其實無一套好完整、防止人「走佬」嘅機制。囍雨想問下，如果有涉違嚴重罪行嘅重犯，法庭唔俾佢保釋，合理；同樣係重罪，法庭決定俾被告保釋前，係咪應該有一套配套或者系統防止人「走佬」，例如係電子腳鐐或者電子追蹤器？

為何重罪疑犯難以保釋？

之後黎智英會唔會「走佬」，囍雨唔知道，但如果黎智英真係「走佬」，囍雨就會有個疑問，有冇人要為此負責？無罪假定呢個原則，囍雨認同，但大家可以諗下，點解涉嫌犯下重罪嘅人一般唔俾保釋？因為佢哋潛逃風險極高，法庭需要喺個人利益同公義之間取得平衡，當其他涉嫌犯下《國安法》嘅人唔俾保釋而黎智英可以，其他市民同囍雨一樣充滿「問號」！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk