現年19歲、涉嫌犯下暴動、襲警罪嘅學生曾志健，本來噚日應該喺區域法院應訊，但最後並沒有到庭應訊，法庭遂發出拘捕令；曾志健喺聆訊前原來接受過傳媒訪問，稱「想避免不公平審訊」，而一個組織就發聲明稱曾志健正在「流亡」、「自由地生活中」。成件事好簡單，就係有人畏罪潛逃，所謂「避免不公平審訊」，根本只係藉口。

本質就是潛逃

曾志健案之所以備受關注，因為佢就係去年10月1日涉嫌襲警，被警員槍傷嘅一個中學生；關於案件、關於大家喺互聯網上睇到嘅影片，囍雨暫且唔講，佢接受訪問稱「想避免不公平審訊」，容許囍雨講句，根本就係藉口，佢好明顯係想逃避審訊甚至罪責繼而潛逃，事件與法庭、法治無關。

囍雨想指出，不論係犯暴動以至襲警罪，曾志健或者其他被告被檢控而到法庭受審，係用一套行之有效嘅《普通法》制度審訊，過程當中可以否認控罪、可以抗辯，法庭係會審視所有證據；而就算被判有罪，被告有權上訴，甚至可以上訴到終審法院。囍雨想問下，所謂「不公平審訊」，係咩意思？如果係清白嘅，又怕咩上法庭？

接二連三發生潛逃案

由涉及2016年年初旺角暴動案嘅黃台仰開始，不斷都有案件嘅疑犯潛逃在外，最新嘅例子有曾志健，早前嘅例子就有前立法會議員許智峯，囍雨質疑，喺一啲案件上面，法庭批准保釋嘅條件，係咪有需要再收緊呢？例如涉嫌犯下重罪，仲俾唔俾保釋？俾保釋嘅，不論有冇「公務在身」都要交出旅遊證件？又或者就算保釋到同已經交出旅遊證件，又駛唔駛配合電子腳鐐或其他監察設備？

之前有政客涉嫌違法，囍雨已經唔止講過一次，政客犯法，一樣有刑責；同理，青年犯法，一樣有刑責。法庭可能會因為年齡、是否在學、是否有悔意等因素考慮係咪減刑，但咁唔代表「後生仔女」犯法就可以免責。今次曾志健一案，不論佢因為咩原因「走上街頭」，由佢上街、涉嫌犯案到潛逃，局面都係由佢一手造成，囍雨只能講句，如果唔想有罪責，唔想同家人離別，唔想離開香港，最好就係唔好犯法，唔好聽從政客唆擺、煽動！ 

圖片來源：大公報、RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk