呢排大家睇新聞，會發覺唔少「身有屎」或者「心有屎」嘅政客，接二連三走嘅走、逃嘅逃。廣男噚日睇新聞，又見到一個叫許穎婷嘅人士喺自己facebook宣布「離開香港」。

齋聽個名，廣男真係醒唔起佢究竟係邊位；再睇深入啲，先知佢原來係前學民思潮嘅成員，勉強較「為人所知」嘅，可能係佢曾經寫過一篇題為《I am from Hong Kong, not China》嘅文章（大意係「我來自香港，不是中國」）、創立過一個叫「我哋係香港人」（WE THE HONGKONGERS）嘅在美港人組織。依家許穎婷宣布「離開」，咁其實即係走佬？仲有，佢所謂「not China」，何解？係咪好有獨味呢？

許穎婷是誰？

一個連名都唔多人知嘅人點解要走佬，廣男相當費解！不過人要走，總有千個理由。許穎婷就話自己好難捨、好沉重；「一再拖延良久，最後無奈離開」，然後又話離開只係過程，自己「生為香港人，死也為香港魂」、「但我對重光的決心依然」，仲講到「未來定必活用自己的長處去對抗敵人」云云…

簡單嚟講，成個「鋪排結構」又係先講到自己幾咁為勢所逼、但又萬般不捨；然後未來日子就算「流落異鄉」、都必定「忍辱負重」幫香港打國際線咁款，咦！吹到咁好聽，照咁再發展落去，下一步係咪又諗住開專頁搞眾籌呢？唔係廣男多心，事實上呢個套路，許智峯係咁、梁頌恆係咁，依家呢個許穎婷，會唔會又係下一個「先走佬、後眾籌」嘅騙局？

一場「口水革命」？

如果你問廣男，廣男就話，無論許穎婷依家吹得幾咁係威係勢流流長都好，其本質都好簡單，就係走佬！其實過去呢段時間，呢場所謂「時代革命」裡面，叫人衝、自己鬆嘅例子大家已經睇過唔少，老實講，古今中外歷朝歷代，真係搞革命嘅人都預咗「賭人頭」，但喺香港，果班攬炒派不論老中青，其實個個都喺度「賭口水」！結果到最後，最慘就係果啲信咗政客煽惑而去送頭嘅「衝衝子」，人哋就風光、佢哋就踎監。走佬嘅人，其實仲有咩資格話自己「生為香港人，死也為香港魂」呢？！

所以廣男喺度真係要再呼籲年輕人一句，好好睇清楚，你哋嘅所謂「領袖」，依家都變成「揮揮衣袖」一個接一個走咗佬喇！所謂抗爭，總係可以被人講到好浪漫，但當你自己要付出代價嘅時候，永遠都無比沉重。當走佬嘅許穎婷仲可以好風涼咁話「對於自己的僥倖感到無比慚愧」時，廣男真係想講，唔知果啲「不僥倖」嘅人，又可以點？

原圖：許穎婷facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk