因為涉嫌違反《港區國安法》入面嘅「勾結外國或者境外勢力危害國家安全」罪，《生果報》老闆黎智英正被還押，外界開始有猜測，就係黎智英到底會唔會被「送中」審訊呢？如果唔依《國安法》相關條文將佢「送中」審訊，香港特區又有冇能力處理到呢單涉及美國甚至英國嘅「複雜」案件？
案件複雜 又涉外力
對於黎智英會否「送中」受審嘅問題，今日《生果報》都有報道，並引述前立法會議員林卓廷，指有人撰寫文章喺度鋪路、試水溫，想測試將黎智英「送中」審理，香港民情有幾大反彈，稱「佢更加係恐嚇香港人，要港人全面去臣服於國安法打壓，要我哋全港人全面噤聲」。恐嚇香港人？要港人臣服於《國安法》？林卓廷係咪唔服《國安法》？係可以講清楚喎！
其實黎智英一案，大家首先要清楚，一個拎英國護照嘅香港「傳媒老闆」，去到美國，竟然可以同美國副總統彭斯同國務卿蓬佩奧會面，仲喺美國一個活動上話自己「為美國而戰」，大家諗下，佢到底係「美國嘅人」？定係「中國嘅人」？當黎智英被加控涉違《國安法》時，彭斯、蓬佩奧出聲之餘，連英國外相藍韜文都「聲援」佢，要求「結束針對」黎智英，唔通因為黎智英係「英國人」，所以英國又要撐住佢？
讓「國家隊」對「國家隊」
喺呢個情況底下，容許廣男坦白講句，呢個唔一定係特區政府可以處理到嘅範圍，因為黎智英一案既複雜，又涉及外國或境外勢力，而黎智英嘅所作所為，更加涉嫌危害國家安全。如果由特區政府處理，用球賽去作比喻，就係「地區隊」對人哋「國家隊」；係咪應該考慮將情況改變，依法將黎智英「送中」審理，讓「國家隊」對「國家隊」呢？
廣男執筆之日，就睇到一單新聞，連台灣嘅總統蔡英文都為黎智英發聲，稱「很佩服他經營企業的膽識，以及對香港的由衷熱愛」。依家美國、英國同台灣等地方嘅政要同政客都「聲援」黎智英，咁係咪更加證明到案件嘅複雜性，需要按《國安法》第55條將黎智英「送中」受審？其實，之前西班牙加泰隆尼亞一班「獨派」，受審時都係喺西班牙最高法院審，唔通涉及國家安全，仲俾地區「自行處理」咩？
圖片來源：中通社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論