攬炒派政客成日話，「黃藍是政見，黑白是良知」，講到全香港得佢哋「有良知」咁款，永遠都係「正義」，而對方永遠都係「邪惡」。昨日，唔同嘅媒體都報道「藍營」支持者李偲嫣離世嘅消息，一如囍雨所料，好多攬炒派支持者都表示「高興」，有唔少仲話要「開香檳」，而現時近乎係攬炒派唯一一個立法會議員鄭松泰，仲喺Facebook話「如果你為土共逝世搖頭嘆息，又叫其家屬保重⋯⋯你憑什麼說『黑警死全家』？」、「你對唔對得住手足？」，堂堂一個立法會議員，見其他人為死者「嘆息」都要鬧，想問下鄭松泰以至其他攬炒派支持者，你哋嘅「良知」，係咩「良知」嚟？

政同不同 亦不須幸災樂禍

睇返鄭松泰Facebook，其實佢唔止出咗一個Post去「講」件事，例如噚日，佢就先分享李偲嫣離世嘅新聞，然後加一句「積善之家，必有餘慶；積不善之家，必有餘殃」；差唔多同一小時，佢又再發帖稱「善惡之報，如影隨形，三世因果，循環不失。此生空過，後悔無追」。再之後，就發帖稱「如果你為土共逝世搖頭嘆息，又叫其家屬保重⋯⋯你憑什麼說『黑警死全家』？」鄭松泰應該唔會否認佢講緊嘅係關於李偲傿離世呀？一個立法會議員，要靠「消費死人」呃Like？真不該！

老實講，喺今日「黃藍分明」嘅世界，唔同人之間政見唔同，好正常，但係咒人死，想人死，笑人死，呢啲人嘅人格，或者所謂嘅政治理想，可以有幾高尚？一啲攞死人嚟講笑話嘅人，其實絕大部分都係攬炒派支持者，成日話要爭取民主自由，囍雨又想問下，民主需要包容唔同政見，如果政見唔同就想人死，呢啲人又有幾民主？俾佢哋爭取到民主，會唔會香港情況變到極壞呢？

鄭松泰小心「抽水」抽出禍

至於鄭松泰，就係攬炒派當中無良嘅一個例子，鄭松泰除咗語帶譏諷，仲借機連警察都講埋，囍雨覺得事情其實好簡單，既然鄭松泰直頭係想「對家死」，咁建制派往後喺立法會，係咪唔駛對鄭松泰咁客氣呢？可以試想到，他日如果再有建制派人士遇到意外、遭逢不幸等等，鄭松泰係唔會慰問，反而可能攞嚟「抽水」，如果建制派對鄭松泰客氣，咪即係對自己殘忍。

喺生死關頭，往往我哋會睇到人嘅良知，而今次攬炒派政客、支持者集體「抽死人水」一事，我哋會睇到，如果「黑白是良知」，咁好明顯，佢哋就係無良知！ 

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk