喺香港涉及「三案九罪」嘅許智峯，借外訪之名「潛逃」海外，事後外界除咗關注佢同家人嘅銀行戶口「狀況」外，亦有唔少人質疑，到底許智峯走佬但又唔即刻辭去區議員職務，政府又無即刻「做嘢」，佢咪即係走佬都仲有人工？今日，終於有傳媒報道指，政府會暫停向許智峯發放其區議員嘅酬金、津貼同開支。囍雨覺得，政府總算從善如流，其實面對攬炒派政客，必須當機立斷，「該斷則斷」。

不可能出糧予許智峯

對於許智峯區議員「人工」嘅問題，囍雨覺得近期信息有啲混亂，最開頭嘅說法，係意指著草英國嘅許智峯仲「出緊政府糧」，之後有政界人士指其實已經停咗，再之後政府代表又話要研究，搞到外界都唔敢肯定許智峯到底仲有冇公帑「落袋」，依家總算有個正式且最後嘅說法。講真，許智峯潛逃、無履職在先，唔出糧俾佢係天經地義，駛乜驚？

據了解，政府會盡快釐清相關法律責任事宜，囍雨認為，法律問題故然要梳理好，但政府可以做多件事，就係攬炒派政客潛逃事件「無日無之」，政府絕對可以研究出一套機制，去應對他日攬炒派議員「潛逃」後嘅人工、津貼問題。簡簡單單，想走佬而仲想袋政府人工（即公帑）？無可能！

許智峯為何不辭職？

講返許智峯，其實佢先係事件嘅始作俑者，佢畏罪潛逃呢一筆，囍雨暫且唔講，佢自己已經潛逃咗，即係唔會喺地區履行到區議員職責，點解佢仲可以咁厚顏唔辭職？係咪心存僥倖，諗住出區議會「糧」出到俾政府停先算？或者等幾個月區議員資格喪失再算？除咗貪得無厭，囍雨真係唔知點形容佢，依家區議員月薪為35,070元，仲有每月雜項開支津貼7,940元，佢係咪以為可以「袋袋平安」？

大家唔好忘記，許智峯除咗區議會人工問題，佢之前眾籌打官司，被警方接揭發挪用85萬元，條數都未夠清楚，例如佢公布嘅帳目係去到今年六月底，六月之後條數如何呢？又例如，佢幫襯「同路人」兼中西區區議員楊浩然律師處理眾籌戶口，但點解其中兩宗案件未正式審訊，律師費就超過110萬元？佢有冇借公眾錢益「自己友」？

許智峯人走咗，但刑責仍在，眾籌帳目都要再交代。仲有一點就係，佢依家要打「國際戰線」，擺明勾結外國勢力，有冇犯《國安法》，警方一定要查落去！ 

圖片來源：許智峯Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk