隨住國安法喺香港落實、執行，大家有冇發覺，攬炒派圈中出現一個都頗為普遍嘅現象，廣男形容得文青啲，叫「出走潮」：有啲，選擇退出政壇；有啲，選擇「出走」異國他鄉展開所謂「流亡生活」；有啲，就選擇脫離自己原屬嘅政黨關係、「孤身走我路」。就好似攬炒派第二大黨公民黨咁，噚日，黨內嘅「明日之星」、現任東區區議員鄭達鴻，又正式宣布退黨喇！
廣男用個「又」字，係因為在此之前，近期已經接連有多名公民黨人退黨，包括立法會前議員陳淑莊、葵青區議員冼豪輝、譚家浚，以及南區區議員俞竣晞等，依家又多一個鄭達鴻，聯繫埋公民黨早前所面臨嘅「處境」，廣男好自然會聯想到一個問題：呢班人退黨，其實係咪為咗保自己「平安」呢？
受力捧 都要退？
有時，越係「去意已決」嘅人，越係會將自己嘅離開講到有幾咁艱難、不捨。睇番鄭達鴻嘅退黨宣言，佢提到曾經有前輩話佢「就係黨嘅下一代」，然後又慚愧自己對黨內外事務「改變不了任何一件事」，最後仲對退黨感到「痛徹心扉、十分抱歉」…廣男就有啲唔明，既然講到自己咁艱難，又喺黨內受力捧，點解又要退黨呢？問心果句，係咪覺得公民黨「冇前途」？定係驚公民黨影響自己前途啊？
事實上，鄭達鴻喺今年9月已經以公民黨人身份，報名參選原定嘅立法會換屆選舉，但最後因為「不真確誠意地擁護《基本法》和保證效忠香港特區」，被選舉主任DQ咗，咁依家高調退黨，係咪想為來年再戰立法會「洗底、鋪路」呢？鄭達鴻就叫大家唔使估，「如果形勢沒有180度轉變」，自己「絕不可能」再選立法會喎！驟眼睇，好似實牙實齒，但諗深一層，其實咩叫「形勢、轉變」，都係由得政客自己隨便演繹啫。退一步講，就算鄭達鴻真係唔選立法會，依家退黨係咪想「優先」保住區議會議席、以便日後再作其他打算呢？
一個政黨的沒落？
政客嘅算盤想點打，真係得佢哋自己知；不過從公民黨嘅角度，廣男實在要感慨一句，一個曾經「星光熠熠」嘅政黨，一個星期走咗四個區議員，係咪意味住從此走向沒落呢？廣男就話有時啲嘢，唔使諗得咁複雜，凡事有因必有果！若然當初冇公民黨人勾結外國勢力、冇聯署叫美國「制裁」香港、搞中國，又豈會招致DQ惡果？成個政黨又豈會落得今日呢種局面？好好反省下，好自為之吧！
原圖：鄭鴻達facebook
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論