今日，囍雨喺《生果報》睇到一篇新聞報道，睇到囍雨有啲「摸不著頭腦」，話說一名15歲少女（據報為去年10月1日「中槍」少年曾志健嘅女友）上周抵達倫敦，尋求英國當局政治庇護，並成為咗香港已知「最年輕流亡者」；有所謂人權組織發言人表示，該少女係香港首名「沒有身負控罪」、亦非政治人物嘅「流亡人士」，如果獲得政治庇護，反映國際社會認為香港「人權情況再惡化」。睇到呢單新聞，囍雨首先想問，有人走，就等於香港人權狀況出問題？

 

所涉案件 到底為何

 

對於《生果報》大肆報道呢單新聞，囍雨必先要問句，關於呢名少女嘅「經歷」，外界所知甚少，例如話佢曾經因示威被捕，「因不足16歲而未有被正式起訴非法集結罪，但離港前被不明人士跟蹤」，到底所講嘅「案件」，何時、何地同如何發生？連咩事被捕都唔清楚，外界點判斷佢其實係咪「畏罪潛逃」？ 

 

另一個問題，就係如果真係無被告甚至「唔會被告」，咁點解呢名少女「一定要走」？大家唔覺得有古怪咩？《生果報》好刻意強調佢係去年10月1日喺荃灣暴動現場一個涉嫌襲警、暴動繼而「中槍」少年嘅女朋友，但囍雨要指出，每個人都係個體，佢要走同佢「男朋友」點，唔一定有關係，不如呢名少女講多啲詳情，等市民大眾判斷下佢走得「合唔合理」，而唔係講一堆似是而非嘅嘢出嚟，然後營造「怕被清算」嘅感覺！

 

沒有被控 何來人權問題？

 

其實，睇《生果報》呢單新聞，囍雨就唔係好明白，一個女仔因為示威被捕，至今都未被檢控，如何反映出「香港人權狀況進一步惡化」呢？如果香港人權惡化，呢個涉及案件嘅少女，仲走到？唔好玩啦！依家嘅情況係，不論係政客、非政客，有被檢控、無被檢控都「走佬」，睇落似係有人想逃避刑責多啲，甚麼人權、自由，都只係掩蓋佢哋行為嘅「遮醜布」。

 

囍雨喺度諗，如果涉事者係喺英國示威同涉嫌違法，好可能已經被英國警方「強而有力」地拘捕兼被送上「特別法庭」！英國可以選擇「收留」呢啲所謂「流亡者」，但對唔住，咁樣係改變唔到有人想喺香港生事繼而「走佬」嘅事實。 

圖片來源：新華社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk