繼前立法會議員許智峯畏罪潛逃之後，又一個口口聲聲話要「抗爭」嘅港獨分子走佬了，佢就係青年新政嘅梁頌恆！不過，同許智峯有啲唔同，嚴格嚟講，其實梁頌恆依家冇乜案件「喺身」，咁都要走佬？！睇完梁頌恆嘅走佬理由，囍雨只想問句，其實梁頌恆係咪有「被逼害妄想症」呢？

講起梁頌恆，大家都知道，佢之前因為喺宣誓風波中衝擊立法會會議室，被控非法集結罪成被判囚四個星期，而且已經於今年9月初完成服刑。既然已經坐完監，理論上佢應該冇乜「人身安全」問題，不過根據已經身在美國尋求庇護嘅梁頌恆接受生果報專訪所講，佢出嚟之後因為「明顯感覺被跟蹤」，因而覺得「人身安全受威脅」；又話「所有的監視可以猜想為將會被捕的『訊號』」，所以覺得「係時候要離開」...嘩！原來走佬係靠「感覺、猜想」？呢啲就係梁頌恆嘅「抗爭腰骨」？

走佬是為了不還錢？

人依家就成功走咗，雖則梁頌恆「冇案喺身」啫，但大家唔好忘記，佢有「債」喺身喎！事實上梁頌恆被DQ之後，早前已被裁定要全數向立法會交還薪津及訟費，兩者合計估計約500萬元，而佢本人亦因此被申請破產，但今次梁頌恆已經講到明，對於呢筆錢佢「唔打算處理」，如此一來，大家有冇諗過，梁頌恆走佬，擔心「人身安全」只係藉口，「走數500萬」先至係真正目的！

人走咗、錢又唔還，但問題仲未完㗎！囍雨留意到，梁頌恆果頭喺專訪裡面話對「暫時可以負擔留美經費，毋須眾籌」，話口未完、呢頭就學許智峯咁開咗個眾籌專頁叫大家捐錢，仲口口聲聲話要幫香港打國際線，推動所謂「救生艇計劃」，以及「會推動美方調整制裁中國的方案，例如制裁香港金融」等等，大家仲信唔信？囍雨就話，佢依家身在美國，當然可以「有咁大吹咁大」，除咗幫自己戴光環之外，仲係一個尋求美國主子庇護、叫手足「爽手」捐錢嘅好藉口。但大家要諗下，乜依家「先走佬、後眾籌」係政客搵食新方程式？

黑暴走佬新模式？

講開梁頌恆、許智峯走佬，今日生果報仲有一單新聞，係話一名15歲少女自稱係荃灣暴動案中槍中學生曾志健嘅女友，據報上個星期亦都流亡英倫尋求英庇護，原因係一來「前線隊友」被捕被控，二來自己與曾志健係情侶關係，而被不明人士跟蹤。大家又要諗下，呢個係咪黑暴走佬新模式呢？依家再嚟睇黑暴手足嘅「革命之情」，所謂齊上齊落，真係一個大笑話！

圖片來源：梁頌恆Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk