如果你係「和理非」第一大黨民主黨嘅領導人，未來要重投「議會戰線」，你首先會做乜嘢？全力投入地區工作？成立「影子黨團」？錯！答案係為咗將來可以入閘，首先要同激進派「割席」！民主黨新任主席羅健熙接受傳媒專訪，表示唔應該輕易放棄「議會戰線」，提及到民主黨係咪「漸趨激進」時，羅健熙「並不同意」，而只係喺去年反修例事件，「反應較激烈」。講真，廣男覺得羅健熙係醒嘅，要參選、入閘，如果唔同激進派甚至「港獨」派等割席，又點保住「議會戰線」？將來如果入唔到立法會享受「高薪厚祿」，咁民主黨要點食到「人血饅頭」呢？

 

咎由自取的政團

 

講開立法會，廣男覺得大家首先要明白一點，四個勾結外國勢力嘅立法會議員被DQ，係因為佢哋所做嘅嘢根本無可能係擁護《基本法》、效忠特區嘅表現，其他攬炒派議員包括民主黨嘅立法會議員要「總辭」，係民主黨自己放棄「議會戰線」，與人無尤；依家羅健熙稱唔應該輕易放棄「議會戰線」，但佢哋之前又放棄？會唔會將來選返入立法會，然後又隨時辭職呢？咁市民係咪要諗下支唔支持「一時放棄，一時又唔放棄」議會嘅民主黨？

 

至於羅健熙稱自己唔同意民主黨「漸趨激進」嘅問題，廣男覺得佢講啱一半、唔啱一半，點解咁講？喺過去一年多嘅黑暴運動，民主黨人包括許智峯（已退黨）、鄺俊宇等人，的確有到示威現場支援「暴徒」，比起以前嘅民主黨，當然算「激」；但用另一角度睇，就算民主黨人有「落場」，佢哋係從來都唔會「衝」或者「打砸搶燒」，因為涉及嚴重罪行嘅嘢，佢哋最多等啲「衝衝子」去做，如果唔係有啲咩事，佢哋又點樣繼續做「尊貴」議員呢？所以羅健熙呢番表述，表面係唔同意民主黨「漸趨激進」，廣男睇到嘅係「點會激進？有咩事點繼續做議員？」

 

到不能接受地步會「流亡」？

 

最後，羅健熙嘅前黨友許智峯棄保潛逃，羅健熙則表示驚訝，當被問到自己會否「流亡」時，佢就形容自己極度唔想離開，亦有使命繼續落去，「除非到一個不能接受的地步，否則相信流亡機會較微」；羅健熙咁講，即係佢都係有機會「流亡」？呢個曾經侮辱內地客為「鴉片」嘅民主黨「新主席」，連自己會唔會「著草」都講唔定，對香港幾有承擔，真係「心中有數」！講開又講，羅健熙之前侮蔑內地客，道咗歉未？佢嘅辱華言論，代唔代表民主黨立場？ 

圖片來源：羅健熙Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk