上月底，醫管局決定對因參與今年2月份「政治罷工」而缺勤嘅員工，僅作扣薪處分，而且仲講到明「不作其他人力資源方面的跟進」。囍雨以為事件可以就此告一段落，原來未完㗎！發動罷工行動嘅「醫管局員工陣線」（簡稱「陣線」），今日（11/12）喺《生果報》刊登頭版廣告，以「罷工不是缺勤」為口號作政治宣示，聲言要「凝聚力量抵抗打壓」。囍雨就有啲睇唔過眼，講真，醫管局只係扣薪了事，已經相當仁慈；依家陣線仲要反咬一口、繼續「抗爭」？！

客觀講，如果有員工連續多日曠工或者缺勤，僱主對其扣薪，其實好正常好合理，而且明顯醫管局喺呢件事情上面，係採取從寬處理，冇話要即時炒人，亦都冇所謂「清算行動」。記得當時囍雨仲話，呢種「處罰」，至少對某部分人嚟講可能太輕，未必起到「以儆效尤」嘅作用。果然，依家陣線就開始反撲，喺今日嘅頭版廣告入面仲拋出兩句狠話：「當日罷工爭取五大訴求，我們無怨無悔。今日凝聚抵抗局方打壓，我們寸土不讓。」

陣線打算如何抗爭？

嗌口下號，可以「好有型」，但囍雨想問下，咩叫「寸土不讓」？即係打算唔接受扣薪？如果係咁，陣線又諗住點抗爭？同醫管局打官司？抑或成班人「總辭」？10個月前，喺香港防疫最緊要嘅關頭，陣線就為咗自己政治利益搞罷工、拖香港防疫後腿；依家香港第四波疫情爆得咁犀利，陣線又想搞事、又攞市民安危嚟較飛？陣線今次又想「凝聚」到幾多人，囍雨唔知，但聽醫護界人士講，近期香港醫療壓力已經逼近飽和點，連ICU（深切治療部）嘅病床佔用率都已經超過七成，喺咁嘅情形之下，陣線都仲要顧住「抗爭」，咁對其他專心抗疫嘅醫護又公平嗎？

局方打算如何應對？

另一個問題，囍雨想問醫管局。當初局方一念之仁，冇換來一句感謝，如今陣線仲要擺出「戰鬥格」反咬，局方今次又打算如何處理？囍雨就話，寬待惡意搞罷工、置市民生死於不顧嘅醫護，其實係與虎謀皮、姑息養奸；必要時，局方應該考慮重新審視決定，對於果班攞住公帑為禍醫護界嘅害群之馬，係咪仲要俾佢哋作反嘅空間？囍雨都係果句，對佢哋仁慈，就係對自己殘忍！

原圖：rthk、生果報fb

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk