因為涉及欺詐罪而被還押嘅《生果報》老闆黎智英，除咗得到外國、境外勢力「力挺」之外，佢啲「支持者」近日亦不斷發聲「聲援」佢，廣男留意到，喺一個《生果報》嘅節目，公民黨主席、資深大律師梁家傑同埋民主黨前立法會議員尹兆堅都「歪理盡出」為黎智英開脫。喺駁斥佢哋嘅歪理之前，廣男想問一句，黎智英涉嫌犯下嘅係刑事罪，真係佢哋講到「補錢」就搞得掂嘅租務糾紛咩？
歪理太多 未能盡錄
先講講梁家傑，佢「撐」黎智英嘅說法，大抵係質疑點解唔俾黎智英保釋，同埋質疑案件只係「違反租約」、「業主無損失」，唔係咁「嚴重」，表示極其量都係「補租」云云。廣男首先想講，黎智英所犯嘅唔係咩小罪行，首先《生果報》1995年同香港科技園公司簽下土地租約，租客即《生果報》租用土地係經營「創意工業相關」嘅產業，但三年後，幾名被告包括黎智英涉嫌安排「力高顧問有限公司」佔用部分用地營運其他公司服務產業，違反租約逾20年，期間力高顧問透過生意一直牟利，並涉嫌向業主香港科學園隱藏四年來從力高賺取共1,980萬元嘅租金。換句話說，呢單案涉及欺詐，而且涉款以千萬元計算，該工業用地係公共資源，而且涉及公帑補貼，點會係「小事」，點會可以「補租」了事」？
至於黎智英保釋嘅問題，根據控方紀錄，黎智英喺2017年7月起約2年半間，曾外遊87次，只有共670日在港，擔心三名被告包括黎智英有潛逃同重犯風險，所以反對黎智英等人保釋。梁家傑應該會認為，如果黎智英被沒收旅遊證件，佢就應該「無得走」，但廣男想講，當黑暴「爛頭卒」都有方法潛逃到台灣，黎智英作為攬炒派「金主」、「大台」，要走係咪咁難呢？
至於尹兆堅，廣男覺得佢講嘅嘢比梁家傑更唔合理，例如佢舉例話有人租咗地起多條路，最多咪拆走佢「還原」云云，廣男姑且當呢種行為係屬於僭建；咁僭建同欺詐，係咪可以簡單作比較呢？喺節目當中，身為房委會委員嘅尹兆堅仲話呢啲例子數以十萬計，咁廣男唔駛尹兆堅舉「十萬個」嘅例子，係咪易舉一萬個例子嚟比市民知道下好嗎？
收黎智英捐款要申報利益？
梁家傑同尹兆堅作為公民黨同民主黨嘅標誌性人物，廣男想問下佢哋做乜咁出力「保護」黎智英？係咪因為黎智英一向好「關照」佢哋政黨？不如梁家傑同尹兆堅申報下，過去幾年，佢哋或者佢哋嘅所屬政黨，有冇收黎智英捐款？如果有又收咗幾多？政客若為「金主」發聲，大家都理解，但至少申報利益啦，而且涉嫌違法嘅被告講到好似「無罪」或者好小罪咁，唔過分咩？廣男印象所及，梁家傑仲曾經為大律師公會主席，如今淪為黎智英「打手」？情何以堪！
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論