經歷一年多嘅黑暴運動，大家會發現一個好古怪嘅現象，就係越出力「賣國」、反中亂港嘅政客，越容易得到外國勢力嘅「嘉許」；因為欺詐案正在還押嘅《生果報》老闆黎智英，雖然人在監牢，但都竟然獲奬，被「無國界記者」（RSF）頒發特別獎，以表揚佢對「捍衞新聞自由」嘅貢獻。講真，講新聞，講新聞自由，黎智英以《生果報》嘅最大特色，在於佢哋過去一年極力煽動抗爭，反港府、反中央，呢個係咪黎智英嘅獲獎理由呢？
敢於批評中央？
根據「無國界記者」嘅講法，「當中共壓迫香港新聞自由力道與日俱增，評審團希望向黎智英表達支持，因為黎所創立的媒體，是香港少數仍然敢於公開批評中共的媒體」，問題嚟喇，黎智英獲獎，係咪因為敢於批評中央？如果因為咁而頒獎俾佢，呢個獎本身係咪帶有政治目的，實在值得商榷。
過去一年多時間，香港受盡黑暴運動影響，暴徒「打砸搶燒」、「私了」圍毆市民甚至「殺人放火」，而喺媒體當中，《生果報》可以話係最用力煽動抗爭嘅媒體，明明係暴徒，《生果報》叫佢哋做「衝衝子」；明明係縱火暴徒，《生果報》叫佢哋《火魔法師》；明明知道遊行集會好可能有暴力衝突，《生果報》一於少理，不斷叫人上街。美化違法者、違法行為，呢啲算唔算係新聞自由嘅「一部分」？如果叫人抗爭，叫人反中央係新聞自由嘅表現，咁黎智英「勇奪殊榮」，又真係好「合適」喎！
黎智英因違法而還押！
值得留意嘅係，頒發獎項嘅「無國界記者」榮譽董事吾爾開希表示，今年其他獲獎者無法親身到台灣領獎係因為疫情，但黎智英無法前來，係因為佢嘅「抗爭和勇氣而遭受羈押」；囍雨想講，外界、境外勢力唔好再講到黎智英係受到政治打壓咁，因為黎智英被檢控，係佢名下一間秘書服務公司涉嫌違反工業用地嘅地契，據報相關行為仲涉及過千萬元嘅利益。佢被還押所涉案件，關政治事？關抗爭事？黎智英以至《生果報》，到底係捍衛緊新聞自由？定利用緊「新聞自由」去做政治抗爭呢？如果有人因為抗爭、批評中央而獲獎，咁囍雨必須講句，成件事唔關新聞自由事，而係境外勢力要表揚「反中亂港者」啦！
圖片來源：中央社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論