有時政客啲嘢，最怕就係越揭越多、越描越黑。就好似前立法會議員許智峯咁，所謂遠赴海外「公務探訪」，結果就變成舉家「逃亡」英倫；潛逃之後因為被警方凍結戶口，由於佢自己所聲稱嘅金額與實際被調查數目差距太大，隨即又惹來佢挪用眾籌款項、洗黑錢嘅嫌疑。為咗以示「清白」，許智峯近日又發聲明又公開核數賬目，聲稱眾籌所得款項一早已經全數存入律師樓戶口，但問題又嚟喇，呢位代表律師係邊位？據揭發，正正係許智峯喺民主黨嘅前黨友、中西區區議員楊浩然。大家自然會問，呢啲係咪利益輸送、明益自己友？
為咗幫大家更清楚了解成件事，廣男喺度要回溯小小背景。話說舊年年底，許智峯聯同佢嘅律師團隊發起眾籌，聲稱會用於就五單案件向警方提出私人檢控，但依家許智峯棄保潛逃，咁大筆錢流向如何？講到呢度重點嚟來，根據許智峯出示嘅核數報告顯示，由舊年12月至今年6月，眾籌所得超過港幣360萬元，其中一筆支出，係約112萬元嘅律師費。但報告顯示嘅賬目，只係去到6月份；6月到依家，又係半年，廣男要問，剩低果筆錢依家點？
案件早終止 仍要上百萬？
另一個問題，如果廣男冇記錯，許智峯嘅所謂私人檢控案件，律政司喺司法程序初期已經介入並終止，咁點解仲要花過百萬嘅律師費呢？據律政界人士透露，一般而言，一單訴訟由前期文件往來、到後期完成審訊，甚至過程中仲要延聘大律師、審訊超過一日等種種因素加埋，先至可能需要花費上百萬律師費，但一單已經終止嘅案件都要用到咁多錢，係咪太過匪夷所思、唔清唔楚呢？
廣男公道啲講，喺香港打官司，好多時候「百萬上落」並唔出奇，但今次涉事嘅楊浩然律師，係咪呢個level、值呢個價？老實講，廣男有啲懷疑。唔知楊律師會唔會亦都公開下自己以往幫人打官司收開幾多錢？又或者詳細講下今次點解要用到咁多錢、以正視聽呢？
瓜田李下 許、楊必須交代清楚！
仲有一個問題，當然就係點解許智峯好揀唔揀、偏偏要揀自己前黨友嚟接呢單生意呢？「熟人好辦事」，廣男明白；但除咗黨友身份之外，許、楊二人同係中西區區議員，而且據報共用一間地區辦事處，瓜田李下，好難唔令人「有所聯想」喎！
到目前為止，成件事可謂疑點重重，廣男認為除咗請警方繼續深入調查，大家亦都要追問落去，要求許智峯以至楊浩然必須交代清楚，唔可以又「唔聲唔聲」不了了之！只係唔知，當件事越揭越多之後，會唔會越來越「醜」？
原圖：rthk
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論