估計係因為近期唔少攬炒派人士都「身陷牢獄」（例如黎智英、黃之鋒、周庭等），亦都可能係因為眼見越來越多黑暴分子面對監禁刑罰，作為坐監「過來人」嘅戴耀廷就「有感而發」，喺生果報寫咗篇題為《牢獄的洗禮》嘅文章。相信大家睇到個題目，都大約估到戴耀廷想講咩，內文唔單止美化坐監，仲形容坐監嘅經歷如同宗教儀式嘅「洗禮」一樣。廣男就想問戴耀廷，既然佢講到坐監好似咁「神聖」，點解佢單「違法佔領」案又唔肯認罪、仲要提出上訴？戴耀廷自己都怕坐監，仲好意思叫其他人接受監獄嘅「洗禮」？
戴耀廷篇文有唔少歪理，廣男逐點同大家講解吓。例如文中提到「這些為民主公義而進入監牢的人，是用他們的個人自由，為香港的民主公義付上代價」。廣男想講，佢哋入獄唔係因為咩追求民主、公義，而係佢哋參與黑暴、違法行動，所以要「找數」、賠上咗個人嘅自由；係香港社會因為呢班人帶來嘅破壞同混亂，而付出咗沉重嘅代價。對於好多黑暴人士而言，其實之所以「有今日」，真係要多得戴耀廷唔少，如果唔係有佢嘅「違法達義」歪理，好多人可能未必淪落到要坐監嘅地步，依家仲要聽戴耀廷講「洗禮」，內心會係咩感受？戴耀廷又會唔會有絲毫愧疚？
還想叫更多人坐監？
戴耀廷仲話，「我更希望眾人能視這牢獄的經歷為一次洗禮」，廣男又想問下，咁點解戴耀廷又唔去勸下果幾位班潛逃海外嘅政客返嚟「坐監」負刑責？例如棄保潛逃嘅許智峯、著草走佬嘅羅冠聰、張崑陽等。就以許智峯為例，老實講，其實佢身上嘅九項控罪就算「加加埋埋」，刑罰都未必好重，咁樣都要畏罪潛逃，對於呢啲咁冇抗爭腰骨嘅政客，戴耀廷會唔會勸叫返嚟「洗禮」下？又例如還押緊嘅壹傳媒老闆黎智英，戴耀廷又會唔會勸佢老老實實去牢獄為爭取民主公義「付出、犧牲」？話時話，依家戴耀廷自己都仲申請緊上訴，似乎諗盡辦法令自己唔洗坐監，佢依家講咁多嘢，又真係冇乜說服力喎！
本來將坐監講成「洗禮」已經夠離譜，但係戴耀廷仲要全力推銷，坐完監會「培育出更強的抗爭韌力」，抗爭將會因為「有更多人經歷過牢獄的洗禮而變得更堅定」。大家又好應該反問戴耀廷一句，講到咁，即係想叫更多人坐監？依家已經有咁多年輕人參與黑暴被起訴、被判囚，都仲未嫌夠？仲想推人去犯法、坐監？戴耀廷的良心何在？
想做「違法達義教」教主？
所以廣男喺度提醒大家，對於戴耀廷以至攬炒派政客，大家唔可以淨係「聽其言」、更加要「觀其行」，睇下佢哋所講嘅嘢，自己又係咪做得到。坦白講，廣男嘅感覺係，戴耀廷依家就好似香港嘅「違法達義教」教主咁，信者，唔係得救，而可能係坐監、攬炒！大家可以睇吓，戴耀廷除咗一味靠害、「謀殺」香港之外，幾時有做過有建設性嘅事？戴耀廷要坐監受「洗禮」係佢自己嘅事，唔該唔好再誤導、荼毒年輕人！
圖片來源：中通社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論