最近處於「多事之秋」嘅攬炒派大黨民主黨，日前舉行換屆選舉，選出新任正副主席並舉行記者會。囍雨心諗，咁重要嘅政圈動向，大家梗係相當關注啦，所以一眾行家聞風亦都紛紛前往採訪，但據聞偏偏網媒《港人講地》嘅記者當日就被民主黨總部嘅職員拒之門外、唔俾採訪記者會。咁就真係令囍雨費解喇，民主黨以至攬炒派，唔係成日「捍衛」新聞自由、採訪權利、公開透明嘅咩？依家一間合法、正常嘅新聞媒體、循正常途徑進行採訪，你自己反而阻攔，民主黨嘅「新聞自由」，好難捉摸喎！

我有邀請你，但拒絕你採訪？

囍雨專門向行家了解過件事嘅過程同一啲細節，發覺民主黨嘅講法同處理，好多地方根本講唔通。例如職員唔俾記者入內，理由係《港人講地》記者「沒有回覆邀請函」，但據了解，記者查遍公司電郵同WhatsApp記錄，根本就唔見有任何來自民主黨嘅採訪邀請；記者追問職員究竟發到邊個電郵地址，職員又以「我要電腦先開到個資料庫」為由推嚟推去、最後不了了之。咁其實，究竟民主黨係咪真係向《港人講地》發出過邀請呢？

退一步講，就算記者真係miss咗份邀請冇回覆到，如果民主黨真係有心歡迎媒體採訪嘅話，點解又唔接受記者當場報名呢？即係「我有邀請你，但拒絕你報名」，咁唔係好自相矛盾咩？更何況根據囍雨所了解，第一，《港人講地》係喺政府新聞處有註冊嘅正規網媒，唔係果種求其僱個學生、揸部手機就當係「記者」嘅假媒體；第二，民主黨當日嘅記者會並唔係以視像方式進行，媒體都有正常採訪嘅權利，咁如果其他媒體（甚至據稱包括一啲建制派媒體）入得，點解唯獨是《港人講地》要被拒之門外呢？定係民主黨有針對性地篩選媒體？

講一套做一套的「新聞自由」？

囍雨提出呢個問題，其實係有啲「原因」。睇番《港人講地》嘅一啲報道，早前曾經率先踢爆攬炒派金主黎智英懷疑利用將軍澳工業邨《蘋果日報》總社違規經營、涉嫌欺詐；近期又不斷追蹤報道前立法會議員毛孟靜嘅僭建醜聞…係咪因為咁而被民主黨「標籤」咗唔係「自己友」？囍雨唔知，但講開又講，民主黨、攬炒派人士，唔係一向好支持媒體應該發揮監察作用咩？依家因為有自己人被監察，態度就180度大轉變？如果係咁，就真係同佢哋一直所聲稱嘅「捍衛新聞自由」立場背道而馳！

所以囍雨不嬲都話，聽民主黨講嘢，邊句真邊句假，真係好視乎「地點、場合、對象」，好多嘢佢哋都係講一套做一套；對自己一套、對其他人又係一套。最後囍雨想問下，對於今次事件有打壓新聞採訪自由之嫌，記協有咩回應？會唔會發聲、協助？

原圖：《港人講地》圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk