囍雨一直認為，攬炒派或者反政府人士，做人做事一向極為雙重標準，經常將法治放在口邊，但就一直破壞法治；一直攻訐其他人如何「粗暴」，但最粗暴就係佢哋！日前，被控欺詐罪嘅《生果報》老闆黎智英唔可以保釋被還押，處理案件嘅總裁判官蘇惠德收到恐嚇電話，據報恐嚇內容仲涉及要「炸死」其家人。囍雨認為，恐嚇他人不能接受；恐嚇司法人員，更係挑戰法治嘅嚴重罪行，警方必須全力徹查事件，將違法者繩之以法！

蘇官資料 早在「網上」

對於蘇官被恐嚇，囍雨覺得有三點值得留意，第一係蘇官日前正係負責緊黎智英一案，黎智英不獲准保釋；第二，蘇官同一般法官或裁判官唔同嘅地方，在於佢係一位《國安法》指定法官。最後，則係蘇官嘅個人資料，其實今年一月初，已經被上載到一個社交頻道群組內，涉及佢嘅手機號碼、住址以及相片等。綜合以上資料，係咩人作出恐嚇，相信大家都有一個「想法」。

老實講，如果因為蘇官決定「不合心意」就恐嚇佢，咁好明顯係赤裸裸地挑戰法治，今日蘇官被恐嚇，他日其他法官，一樣可以隨時被恐嚇，甚至受到傷害；退一步講，如果不滿意蘇官嘅做法，套用返反政府人士嘅說法，唔係有一套投訴機制咩？點解要用不法手段恐嚇人呢？

另一個問題，在於蘇官嘅資料一早俾人起底，即使係一般人要打電話去「恐嚇」佢，可以話係完全「無難度」；警方喺呢方面，絕對可以加大力度執法，包括要求刪除呢啲個人資料，以及拘捕所有涉及「起底」案、尤其係涉及法官資料嘅違法者！

這是挑戰國家嗎？

就如囍雨在上文所述，蘇官唔係一般法官，而係一位被指定為可以處理《國安法》相關案件嘅法官或者裁判官，依家有人如此放肆地恐嚇佢，呢種算唔算係對特區政府以至國家嘅一種挑戰？攬炒派經常強調法治，囍雨好想知道，佢哋會唔會譴責相關行為，同呢啲「罪犯」割席？自從黑暴運動之後，攬炒派以至反政府人士就視法律如無物，今次有裁判官被恐嚇，囍雨覺得當中原因，可能都關於執法未夠嚴，但願警方全力執法，將不法之徒嘅「氣焰」完全壓下來。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk