身負「三宗案件、九宗控罪」嘅民主黨前立法會議員許智峯，宣布自己「退黨流亡」，有傳媒報道，兩位丹麥議員知道許智峯想離開香港後表示「支持」，於是透過國會向許智峯發出邀請，令香港當局俾許智峯「離開」，所以許智峯所謂到丹麥出席氣候變化會議，根本只係「掩飾」。換句話說，許智峯嘅潛逃，根本就係早有預謀？攬炒派政客要「違法達義」，想奪權變天，但又要怕承擔罪責？依家有名政客「著草」，無名黑暴「入獄」，所謂「齊上齊落」，根本就係呃人嘅政治口號！
許智峯不是「政治犯」
講到許智峯，囍雨必須首先講句，許智峯唔係「被逼害」，亦唔係咩「流亡」，而係赤裸裸嘅畏罪潛逃，無論其他攬炒派政客或者支持者點「美化」佢，都改變唔到佢係逃犯嘅事實！囍雨留意到，許智峯先去外國勾結外國政客，繼而發表有「港獨」意味嘅「流亡」宣言，喺佢嘅「三案九罪」上面，依家應該加多一項涉嫌《港區國安法》嘅罪行；佢因為罪名較輕嘅罪而潛逃，繼而涉嫌犯下更嚴重嘅罪行，難怪有人話許智峯係「瘋鴿」。
許智峯嘅潛逃事件，當然唔係「唯一例子」，之前涉及旺角暴動案嘅黃台仰、李東昇等人，都係政客潛逃嘅經典例子。呢啲「人板」折射出攬炒派政客以至支持者一種典型心態，就係「政府唔答應我哋訴求，我哋就破壞」，各種違法行為以至「打砸搶燒」，無所不用其極，結果被捕、被檢控，而不論有冇潛逃，其他攬炒派人士都要「美化」呢啲人，但囍雨想問一句，如果唔係有人違法或者涉嫌違法在先，駛咩要潛逃？唔係想講犯法都係「被逼」呀？
「奪權」有代價
攬炒派搞咁多嘢，歸根究柢就係想政府「冧檔」，想奪權，囍雨好想講，搞革命，係要付出代價嘅，邊有政府容許政客、暴徒違法而唔追究呢？難道要政府放生違法者，然後仲要同違法者講「唔告你哋啦，今次唔得就下次嚟過」？囍雨相信，任何國家最不能接受嘅違法事情，就係有人違法且危害到國家安全，攬炒派由去年開始，不斷挑戰國家、港府底線，用盡全力破壞，依家「著草」政客仲想扮被逼害？點解唔坦誠啲講，自己革命失敗，不得不走？今日許智峯嘅例子，話俾大家聽不論係議會、街頭甚至國際戰線，都唔會打擊到特區政府以至國家，反中亂港嘅，想挑戰法律嘅，一係做好入獄準備，一係就做好永遠離開香港嘅準備。
圖片來源：Frie Grønne twitter
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論