網媒《港人講地》今年四月率先踢爆，黎智英懷疑在將軍澳工業邨《蘋果日報》總社違規經營秘書公司，涉嫌違反將軍澳工業邨嘅地契條款，佢同另外兩名集團高層被控欺詐罪，案件今日提堂，押後到出年四月中再審，黎智英嘅保釋申請被拒，需要即時還押。正當全世界都關注緊黎智英嘅「去向」時，廣男留意到一單新聞，稱近日美國白宮聯署網頁有一個要求「調查黎智英」嘅聯署，指佢喺美國大選涉嫌發布虛假訊息、非法干預，要求對佢作出調查。黎智英喺香港俾警方查緊、告緊，喺佢「美國主子」果邊又有人要求調查佢，佢算唔算係「前無去路，後有追兵」？
連「主子」都敢碰！
可能大家對有關事件唔係好了解，等廣男簡單講下發生咩事。話說美國大選前，美國NBC揭發《蘋果日報》涉嫌委託「虛構人物」，炮製攻擊當時美國總統候選人拜登同佢個仔嘅「黑材料」，事後《蘋果日報》以至黎智英都否認事件，不過原來「委託者」係佢助手Mark Simon，而用嘅錢亦係黎智英公司嘅錢，黎智英於是「割席」、「棄車保帥」。不過，「人」係黎智英嘅，「錢」又係黎智英嘅，黎智英自稱「無辜」，大家信唔信？依家俾人用攬炒派最鍾意用嘅「白宮聯署」投訴，黎智英又係咪抵死呢？
成件事嘅本質非常簡單，就係黎智英或者Mark Simon想喺美國總統「落注」，支持現任總統特朗普，但就天網恢恢，俾人踢爆涉嫌造假；老實講，「落錯注」，梗係有代價要付啦，美國共和黨點睇黎智英，廣男就唔知啦，但斷估美國民主黨、未來總統拜登，唔會輕輕放過黎智英呀？所以，有人發起白宮聯署可能係第一步，之後美國當局調查黎智英，繼而檢控、「制裁」佢等等，或者就係黎智英將要面對嘅事。
中美都不歡迎他？
喺香港，黎智英正在還押，仲有其他控罪「在身」，甚至涉嫌觸犯極嚴重嘅《港區國安法》，如果連美國都封殺佢，咁佢就真係「無路可走」喇！玩政治玩出火嘅例子我哋見唔少，但玩到好似黎智英咁，連美國總統都得罪埋，又真係好少見。可能失去美國呢個「大靠山」，黎智英嘅結局，似乎大家都預見到喇！
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論