身負三宗案件、九宗控罪嘅民主黨前立法會議員許智峯，日前「突然」現身丹麥哥本哈根，雖然佢向外聲稱自己只係去每年一次嘅外訪、討論嘅係「氣候變化」議題，但當地嘅反對派國會議員就相當誠實，向媒體表示要利用許智峯此行「以華制華」，許智峯亦隨即被質疑可能觸犯《港區國安法》，兼有藐視法庭之嫌。最神奇嘅地方係，有報道指許智峯嘅父母、妻子同兩名幼年子女喺噚晚搭飛機離港，到底許智峯係咪帶同一家人「潛逃」呢？大家唔使再估估下，執筆之時，原來許智峯已經透過facebook正式宣布流亡！
曲折離奇嘅「外訪」
講起許智峯潛逃一事，之前佢仲一直有自己一套講法，但囍雨就覺得當地反對派國會議員Uffe Elbaek嘅說法非常值得參考。據傳媒報道，Uffe Elbaek聲稱，「出於公民抗命而虛構三日有關氣候變化的訪問行程，實際上，許智峯此行將會見國會外交事務委員會及對華鷹派的丹麥前首相Anders Fogh Rasmussen」，仲話「安排虛構（fictitious）的會面行程來製造煙幕，迫使執政黨採取行動協助香港，及重新考慮整套對華政策」，即係話，許智峯去丹麥，根本就係勾結外國勢力！
其實任何人只要用常理諗諗，一個已經唔係立法會議員嘅「中西區區議員」，無端端點會要去北歐「外訪」呢？仲要係講「氣候變化」？！依家許智峯終於親自證實：「我剛結束一連三日的丹麥外訪，在此正式宣布流亡，並退出香港民主黨，暫別香港。」但佢話自己「流亡決定倉促」，大家信唔信？囍雨想講，許智峯「倉促」到可以安排埋「外訪」、安排埋家人漏夜都要坐飛機離港，都真係有嗮舖排！至於佢講到自己「永遠不會移民…我的家只有香港…我必定會回家，在光復後的香港」，講咁多，其本質咪一樣係掉低手足自己走佬！扮咩悲情啊！
名人可潛逃 無名者入獄
經歷過羅冠聰、黃台仰等人潛逃在外嘅「經驗」，加埋今次許智「走佬」事件，囍雨覺得當中最大嘅意思，莫過於攬炒派當中，有名有姓嘅政客潛逃，就受到外國勢力「熱烈歡迎」，而其他「無名無姓」嘅黑暴分子，大部分只好乖乖地等待入獄，有啲就算成功潛逃，例如五名去咗台灣嘅黑暴分子，都可能受到冷待，甚至「下落不明」，真係「同是黑暴同路人」，命運卻大大不同。
最後囍雨想講，法庭准許許智峯以公務理由離港，即係明俾機會佢「著草」！呢個司法問題真係值得深思！
原圖：文匯報
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論