賣國者，通常有個特點，就係全世界都覺得佢嘅行為係賣國，但佢會覺得自己「啱晒」，甚至會一而再、再而三作出賣國行為，《生果報》老闆黎智英，就係當中嘅「表表者」。曾經揚言「為美國而戰」嘅黎智英，噚日就喺社交平台玩直播，期間先批評國家領導人係「獨裁者」，繼而促西方國家警惕，並向中國「施加壓力」，以阻止其改變國際秩序云云。叫外國向中國施壓，咁算唔算係觸犯咗《港區國安法》當中關於勾結外國勢力嘅罪行呢？
黎智英罪嫌極重
對於黎智英嘅言行，「廿三萬監察」發言人王國興指出，黎嘅有關言論顯示佢期望外國勢力插手內地及香港事務，有違反《港區國安法》之嫌，促請當局盡快拘捕、搜證並檢控黎智英；立法會議員葛珮帆，更批評黎智英至今仍然死性不改，繼續用同樣手段唱衰國家同香港，甚至詆譭國家領導人，對此感到氣憤。
雖然至今並未有人因為《港區國安法》而被定罪，但囍雨覺得，一個香港傳媒老闆（或者政客），公然喺社交平台叫外國「搞中國」，觸犯《港區國安法》中「勾結外國或者境外勢力危害國家安全罪」嘅罪嫌已經相當大下，執法部絕對有足夠理由介入調查。
講真，經歷一年多黑暴運動、《港區國安法》實施同勾結外力嘅立法會「四人組」被DQ等事件，黎智英對政治咁敏感，無可能唔知佢嘅言行極度踩界，甚至可能觸犯《國安法》；喺明知有可能犯罪嘅情況下仲叫外國「搞」中國，唯一合理解釋，就係黎智英根本無將《國安法》甚至國家放在眼內，否則佢就唔會連國家領導人都詆譭。喺呢個情況底下，執法部門「手軟」，就係縱容黎智英以至其「同路人」繼續肆意地「反中亂港」！
身陷絕境 垂死掙扎？
依家嘅黎智英，面對多宗控罪，又涉違《國安法》；另一邊廂，因為佢同助手Mark Simon涉嫌造假抹黑美國民主黨嘅拜登父子，黎智英絕對可以話係身陷險境，佢喺呢個時候仲挑起火頭，到底為乜？係想用自己最後「一度氣」搏外國勢力干預中國、香港事務？定係佢知自己「大限已到」，所以要做漢奸「直到最後」？無論如何，囍雨只可以講一句，勾結外國勢力，係必須付出代價嘅！
圖片來源：大公報
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論