因為《施政報告》，「異化」成為咗一個形容通識科問題嘅「熱門詞」，先唔講喺學術上或者社會學上呢個詞點解，「違法達義」始作俑者戴耀廷都攞「異化」呢個詞嚟「造文章」喎！佢解釋「異化」係指「原先狀態，因出現突變因素，轉化至與本質有明顯差異，甚至有矛盾和衝突的新狀態」，繼而話有咗《港區國安法》，「林鄭及這些特區官員出現了異化」。其實講到「異化」、「出現突變」，廣男覺得戴耀廷先係「異化」！
法律學者「教人違法」
一個喺本港頂尖大學讀法律、接受《普通法》教育，之後成為咗法律系副教授嘅人，大家諗下，呢個人會唔會係咁教人犯法？答案原來係會嘅！自2013年年初起，戴耀廷就日以繼夜、夜以繼日地宣傳「違法佔中」，話俾人聽為咗達到政治目的，係可以「犯法」嘅！廣男特別想講，戴耀廷所煽動嘅，亦根本唔係「公民抗命」，「公民抗命」嘅非暴力原則，「違法佔中」做唔到；「公民抗命」當中講到要承擔罪責嘅部分，戴耀廷更係唔認罪想「走數」！
戴耀廷「異化」之後，其實唔單止係呃人，佢係連自己都呃埋，違法被告、被檢控，本來就十分合理，但係戴耀廷就講到自己受到政府打壓、政治檢控咁。之後提出「攬炒十步曲」、「民主派35+」等等，每一個行動，已經將違法嘅層次提升到要「搞死」香港。所以，講到「異化」，戴耀廷本人真係無出其右！
過萬人被捕
廣男覺得，戴耀廷自己「異化」，被捕同坐監係佢咎由自取，但最慘嘅係，因為「違法達義」歪風，有好多人包括年輕人、學生被捕。喺過去一年多嘅黑暴運動，超過一萬人被捕，四成係學生，廣男想問下戴耀廷，你自己「異化」就算啦，但害咗咁多人，你於心何忍？
「異化」咗嘅通識，會影響到學生思想；「異化」咗嘅政客，會荼毒到整個社會。由2013年到依家，接近七年嘅時間，廣男想問下大家，戴耀廷除咗俾啲「害死人嘅橋」大家，何曾做過有建設性嘅事？俾佢「老點」咗嘅年輕人，又有無後悔？香港有呢啲所謂「法律學者」，真係香港嘅悲哀。
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論