四名勾結外國勢力嘅攬炒派議員被DQ，另外15名攬炒派議員繼而耍性子玩「總辭」，一班攬炒派議員噚日「Last day」，葉建源接受訪問時，稱離任對自己係一種「解脫」，曾任教師嘅佢希望可以「重執教鞭」，仲話「大學、中學、小學、幼稚園我都願意」，但笑言「唔知邊度敢請我」。老老實實，葉建源「在位」期間，不斷包庇失德教師、問題教材，對黑暴問題又「視而不見」，梗係無人肯請佢啦！

十分喜歡孩子？！

葉建源噚日舉辦傳媒惜別會，提到自己「解脫」，以後可以有更多時間做一啲自己感興趣、快樂嘅事，甚至可代課、教書「重操故業」；據葉所講，佢自己以往教中文為主，但應可勝任通識、初中數學等科目，仲話願意到大中小學甚至幼稚園教書，但由於無幼兒教育證書，笑言「可於幼稚園擔當校工」，表示自己十分喜歡孩子。廣男唔明白，如果葉源咁「喜歡」孩子，點解佢做教育界立法會議員時，又成日為禍教育界、「毒害」孩子呢？

教協以至葉建源，喺過去一年多時間，做得最多嘅事，就係包庇失德教師。仇警嘅教師，佢哋包庇到底；襲警罪成嘅教師，佢哋選擇唔譴責；甚至散播「港獨」訊息嘅教師，佢哋都要包庇。廣男想問，如果真係「喜歡」孩子，咁教協以至葉建源，點解要包庇為禍教育界嘅敗類？橫睇掂睇，葉建源都係「害苦」孩子多啲！

葉建源 = 計時炸彈

另一個問題，在於黑暴運動期間，超過一萬人被捕，四成為學生，反映香港教育出現問題，廣男又要問下教協以至葉建源，點解除咗講下反對暴力之外，佢哋從來都唔大力譴責暴徒，同暴徒割席？如果俾葉建源教書，學生話要「違法達義」，葉建源會阻止嗎？如果其他同事煽動學生反政府，佢又會出聲咩？

面對錯嘅事，葉建源無去指正；面對不斷嘅暴力行為，亦唔覺葉建源有「出聲」，喺呢個情況底下，邊會有學校請個政客入去教書？葉建源嘅存在，就好似一個「計時炸彈」咁，平時非常溫和，但一有事嘅時候，佢就會化身為反動勢力嘅「自己友」，如果有學校請佢，分分鐘會俾佢利用教協嘅勢力「搞」返轉頭，葉建源唔知邊度「敢請佢」，其實問題係，稍為有理性嘅學校，都無可能請佢先啱！ 

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk