曾幾何時，公民黨就猶如攬炒派嘅「明日之星」，一個又一個「巨星」坐陣，令廣男「一度以為」佢好快會超越民主黨，成為攬炒派嘅第一大黨。可惜，好景不常，因為行錯一步，公民黨幾位時任立法會議員不單多次赴美「唱衰」香港，最後更去信要求美國盡快「制裁」香港，令佢哋三個立法會議員被DQ，繼而觸發所謂嘅攬炒派「總辭」。近日，睇公民黨改選執委會，楊岳橋、郭榮鏗等位「勾結外力」政客唔見晒，廣男就喺度諗，「人才凋零」嘅公民黨，係咪已經氣數已盡？
公民黨要「保住度氣」？
據報，喺公民黨嘅記者會上，公民黨被問到四名被DQ嘅議員，有三個係來自公民黨，新一屆執委會如何洗底，連任黨主席嘅梁家傑就稱要「保住度氣」，跟住再被追問新一屆執委會否講明反對「港獨」，而非以「不支持」蒙混過關，梁家傑就解釋話該黨一向好「清晰」，一直係「不支持港獨」，至於美國係咪要制裁香港，係「美國嘅事」。
廣男唔知係公民黨「死不認錯」，定係到呢一刻都「唔知錯」，佢哋有三個立法會議員被DQ，基本上就係因為佢哋之前有幾名立法會議員多次訪美，更去信美國國會，要求對方盡快推行制裁香港嘅法案；今日，就係楊岳橋、郭榮鏗呢啲「禍心」退出公民黨核心，其實綜觀所有證據，叫美國制裁香港可以話係公民黨嘅官方立場，依家有記者俾機會梁家傑佢澄清，佢都依然含糊其詞，係咪下次公民黨嘅人再參選，都漠視自己「要求美國制裁香港」嘅事實，而一味話呢啲係「美國嘅事」呢？如果係嘅話，咁公民黨嘅政客，就要有心理準備喺再參選時有機會被DQ！
核心問題「未解決」
所以，就算公民黨將執委換過，將被DQ議員「退下火線」，公民黨根本就無解決過核心問題，尤其係喺眾多攬炒派政黨當中，公民黨係最出力叫外國「制裁」香港嘅；梁家傑甚至其他黨內元老，將楊岳橋等「被DQ者」換走（都可能係楊岳橋自己引退），多多少少可能都係想保住「議會之路」，但想保住「議會之路」，最應該做嘅係向公眾道歉，承認自己唔應該勾結外國勢力。依家似係想「換血」保住議會之路，但又唔為勾結外國勢力認錯，咁咪兩頭唔到岸囉。
以後、但凡公民黨嘅人參選，廣男覺得政府以至選舉主任把關時，都要問清楚公民黨參選人，到底係「支持」定係「反對」外國制裁香港；係「支持」定「反對」港獨。如果公民黨人答「唔支持」、「唔關我事，美國自己決定」等等，咁又點擁護《基本法》、效忠特區呢？梁家傑如果想「保住度氣」，首先應該代表整個政黨認錯，而唔係仲喺度玩弄「語言偽術」！
圖片來源：公民黨Facebook
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論