做事之前，先講做人。如果你連續多日曠工或者突然缺勤，僱主扣你份糧，其實好合理；唔即炒你，已經係法理之外念及「人情」。調番轉頭，會唔會有人反而走去凶老闆：唔該你唔好再試我底線、打擊我士氣，否則等於引火自焚？對住咁嘅員工，如果你係僱主，仲敢留佢？！

今年2月初，喺香港最需要抗疫人手嘅時候，至少7,000名醫管局員工參與咗由「醫管局員工陣線」（簡稱「陣線」）發動嘅「政治曠工」，以脅迫政府對內地「全面封關」。近日醫管局決定，僅對「缺勤」員工作扣薪處分，而「不作其他人力資源方面的跟進」。講真，囍雨覺得呢種處分，係過輕！但發起罷工嘅「陣線」唔單止唔見好就收，上星期反而發咗份聲明回應醫管局嘅「清算行動」，其中幾句係咁講：「本會敬告醫管局切勿一再測試醫護底線，再次打擊醫護士氣，無疑引火自焚。我們嚴正要求醫管局與本會公開談判，正視工會地位以及同事罷工權。本會亦會就下一步行動跟會員商討。」

該罰不罰 必定後患無窮

大家睇完，有咩感覺？囍雨想問下，果班搞罷工嘅醫護，依家仲「惡過」醫管局？！即係打工又要罷工、曠工仲要出糧；老闆「從輕發落」，員工反而玩恐嚇揚言有「下一步行動」？所以話，有時你放人一馬，有啲人一樣死咬不放，對呢種人仁慈，只會等於對自己殘忍。

既然從輕發落都會「引火」，囍雨建議，醫管局管理層實在無須再縮手縮腳，最好嘅滅火方法，就係揸正嚟做、嚴肅處理！對於繼續惡意生事者，就要處分；對於煽動其他人罷工嘅工頭，更加要將佢哋踢出公營醫療系統。該罰嘅唔罰，必定後患無窮！試諗下，當初香港防疫緊要關頭，呢班人都可以抽香港後腿，如果代價永遠只係「扣工資」，其實等於助長一啲黑心醫護隨時又喺港人最需要醫療服務嘅時候搞罷工。依家香港第四波疫情咁嚴峻，經唔起呢班人再嚟搞破壞；香港抗疫輸唔起，病人權益更加唔可以再被佢哋綁架多一次！

醫管局不要再避事怕事！

經此一事，囍雨真心希望醫管局同埋廣大市民睇清楚，所謂「醫管局員工陣線」，名義上叫「工會」，但性質上，就如同教協為禍教育界一樣，根本就係醫護界嘅攬炒派！為政治，可以違背專業精神，可以唔理病人利益；你避佢一時，佢就敬你一丈，你越姑息，就越養奸為患。局方係時候要下定決心撥亂反正，為香港好、為公眾利益著想，唔好再懼怕擺明搞破壞嘅醫護！

原圖：rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk