同愛侶結婚，要宣誓；上法庭作證，要宣誓；官員就任，要宣誓。宣誓或者簽署聲明，其實就係本身一樣你要做嘅嘢，依家透過宣誓、聲明方式去承諾；不過唔知點解，有人對《施政報告》預告安排現職公務員簽署效忠聲明提出質疑，甚至有聲音話政府可能受到法律挑戰。其實，如果有人要做公務員，要效忠特區同擁護《基本法》，但又唔想宣誓或者簽署聲明，係可以唔做公務員嘅，無人可以逼到「任何人」！

甚麼情況違誓有刑責？

關於公務員宣誓或簽署聲明嘅問題，有公務員代表話如果違反宣誓，係刑事，要坐監，有同事擔心被以言入罪云云。廣男首先想問下，喺咩情況下唔止被解僱，甚至「以言入罪」、可能要坐監呢？廣男唯一想到嘅情況，就係有人違《港區國安法》，咁不論係公務員或者非公務員，其實一樣有刑責，關「打工打到要坐監」咩事？

另一個問題，亦係最根本嘅問題，就係公務員要擁護《基本法》、效忠特區，呢啲唔係應有之義咩？如果有人想做公務員，但又唔願意效忠特區，咁係咪即係入職做公務員，剩係為咗份糧，甚至係「薪高糧準」嘅人工？如果係咁，廣男又要問，政府點解仲要留住呢啲「只為人工，隨時作反」嘅公務員？

宣誓是效忠特區的體現

老實講，所謂宣誓或者簽署聲明，其實只係將公務員本身要做嘅嘢，透過一個正式嘅儀式作出承諾，情況同我哋要結婚一樣，廣男就未見過有人對同伴侶結婚，但就拒絕宣誓作出「承諾」，除非有人好似廣男喺上文所講，有人根本無心履行忠誠。根據傳媒報道，有公務員團體話政府突然要求現職公務員簽署聲明或誓言，涉嫌單方面更改合約，政府或要面對司法覆核。廣男覺得，如果有人要提出司法覆核，係就要快，等法庭作個判斷，順便等政府以至大眾知道，邊個要做公務員但連宣誓、聲明都唔願意！

廣男睇新聞，成日見到啲公務員職位「幾多人爭一個位」，若然有人唔願意宣誓或簽署聲明效忠特區，大可以「退位讓賢」，等啲願意效忠、服務特區嘅有心人「取而代之」。與其咁唔願意，可以同政府「和平分手」，順便去感受下出面被「攬炒」咗嘅商業世界。 

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk