觀乎行政長官林鄭月娥發表嘅最新一份《施政報告》，其中一大亮點，係將香港發展與粵港澳大灣區建設相結合，利用地利人和、優勢互補，拓展香港嘅發展空間。囍雨認為，呢個唔單止係香港自身發展嘅需要，亦都係順應國家發展、應對當前全球大變局嘅必然要求。從港人港企角度，的確係時候轉變思維，把握機遇順勢而「上」，北上大灣區、北上神州發掘新機遇。

年輕人的新方向

作為香港青年一分子，囍雨當然最關心年輕人嘅發展空間。《施政報告》提出「大灣區青年就業計劃」，支持2,000名本港大學畢業生到大灣區就業，月薪由1萬8千元至2萬6千元不等。囍雨認為，呢個方向不失為港青拓展事業嘅好門路。客觀講，大灣區建設係國家重大發展戰略，亦都係依家內地發展得最好最先進嘅地區之一，對人才嘅需求不言而喻，而且好多學科，喺內地先真正有得學以致用，尤其喺香港現時經濟不景同高失業率之下，本地畢業生何不跳出框框，俾自己一個機會北上闖一闖、試一試？唔試過，你又點知自己「唔得」？又點知自己原來係得嘅！

囍雨關注嘅另一個重點，係中央同意港深共同建設深港科技創新合作區嘅「深圳園區」，同位於落馬洲河套嘅「香港園區」，實現「一國兩制」下，位處「一河兩岸」嘅「一區兩園」。之所以關注，係因為講起河套發展，現時深圳一方發展得的確比香港好，不單止緊連福田CBD，而且交通、生活配套樣樣齊備。但反觀香港一側，河套地區一公里範圍內，基本上冇乜便利生活、就業嘅建設。所以囍雨喺度諗，如果未來河套地區加速發展科技創新，再加上如特首所透露，日後嘅新皇崗口岸實施一地兩檢，從而釋放落馬洲超過20公頃土地，咁對於港人未來創業就業乃至居住，又係一片「新天地」。

融合發展 對香港是好事

除此之外，囍雨都好期待「港車北上不設配額計劃」嘅具體落實，即係話，只要合資格嘅香港私家車，好大機會可以唔使受配額限制，就可以經港珠澳大橋進出廣東省，甚至未來有可能將此計劃延伸至其中一個港深陸路口岸，咁日後囍雨約埋朋友去大灣區城市遊玩固之然更加方便，同樣地，港商北上傾生意亦會更加便利，居住內地嘅港人想要往返兩地走親訪友，又多咗一條「捷徑」。大家再諗下，當以後一小時、兩小時生活圈可覆蓋嘅範圍越來越大，咁對於有意北上置業安居嘅港人嚟講，係咪又多咗好多選擇？

換個角度宏觀啲睇，囍雨留意到，《施政報告》仲提到，中央會繼續支持香港鞏固和提升國際金融中心地位，包括加快落實大灣區「跨境理財通」，深化金融「互聯互通」、擴闊可投資股票範圍；會繼續鞏固和提升香港國際航空樞紐地位，包括容許機管局入股珠海機場，令到兩個機場一個「主外」、一個「主內」，協同發展。囍雨想講，其實大家由此可以睇到一點，就係國家推動粵港澳地區融合發展，從來冇諗過削弱香港既有嘅優勢同地位，更加冇諗過俾其他城市「食咗」香港，反而千方百計幫助香港「提升與鞏固」，所以囍雨覺得，香港一方面唔使過度敏感、憂慮，另一方面，其實應該積極諗下，點樣喺國家發展中發揮所長。

平心而論，囍雨由呢份《施政報告》，的確睇到中央對香港嘅大力支持，但香港、港人要走出困局，其實相當關鍵嘅一步，係要靠大家自己願意走出地域局限、心理局限，靠大家「拋棄區分求共對」。尤其當下最最緊要嘅一件事，就係盡快清除疫情，否則幾多支持、幾多大計都無從說起。

原圖：政府新聞處

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk