對一個向學生負責任嘅教育工作者而言，過去一年多時間，乜嘢令佢哋最痛心呢？就係眼見一個又一個學生被政客煽動、被黑暴謊言所蠱惑，繼而走上街頭「違法達義」，最終斷送自己前程。日前，嶺南大學舉行網上畢業禮，校長鄭國漢致辭時，提到社媒嘅陰謀論同虛假訊息氾濫，令部分人被慫恿而參與反社會行為，更形容過去兩年係「對文明社會準則嘅背離」。
鄭國漢所言甚是
鄭國漢所言，絕對有佢嘅道理，根據截至今年九月嘅資料，喺整個黑暴運動當中，就有超過一萬人被捕，當中近四千人為學生，大專生就佔咗當中五成半；換句話說，有超過二千名大專生因為黑暴運動而被捕，作為大學校長，鄭國漢如果唔為此發聲，就枉為大學校長、教育工作者（有大學校長反而包庇涉事學生）。
至於鄭國漢講到社媒嘅陰謀論同虛假訊息，廣男就即刻諗起新屋嶺警察強姦、太子站8.31、陳彥霖去世同尖沙咀爆眼女事件，以上四件事，分別被黑暴描繪成警察性侵被捕人士、警察打死人、警察殺人以及警察射爆人眼睛，結果無數矛盾、衝突隨之而來，反政府人士包括大專生湧上街頭，流血嘅流血，被捕嘅被捕，但最後原來全部都係謊言。
黑暴謊言害人
所謂新屋嶺警察強姦被捕人嘅指控，原來全部都係虛構嘅「呃Like」事件；8.31太子站事件，事後則證實無一個人係被警察「打死」，甚至幾個被稱為「被打死」嘅示威者現身接受媒體訪問；而陳彥霖事件，死者母親亦已表示，去世嘅女兒精神出過問題；至於爆眼女，至今已經人間蒸發，佢亦曾用法律手段想阻止警方查明真相。套用鄭國漢嘅說法，呢啲就係慫恿人參與反社會行為嘅假訊息！
「認清子虛與實情，認清謊言與真相」，係鄭國漢送俾學生嘅臨別之言，其實呢句說話，適用於所有香港人，包括所謂嘅黃絲。今時今日，或者大家都好難再話自己無政治立場，但就算有政治立場，都唔代表要俾黑暴謊言所蠱惑，尤其係唔好被煽動繼而作出違法行為。錯信黑暴謊言而「炒車」已經唔好，如果係錯信黑暴謊言而「違法達義」，更會因而悔恨一生！
原圖：嶺南大學網頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論