香港地一向人多地少，畸形怪狀嘅居住環境催生咗唔少奇樓奇則；「僭建」大家聽得多，但僭建不得止，建完仲要攞嚟當住宅咁租、攞嚟賣，大家又有冇聽過？

千祈唔好以為，呢啲奇聞就一定發生喺窮人區或者新界鄉村，囍雨今日要同大家講嘅呢單「車位變住宅」，就發生喺淺水灣富住宅、喺立法會前議員毛孟靜「僭建小屋」嘅隔離。不過更加奇嘅係，毛孟靜僭建風波爆出十年，唔見屋宇署執法；依家喺佢嘅「僭建小屋」隔離，又被踢爆另有業主將「車位變住宅」，一個屋苑有兩間「車位住宅」咁普遍，屋宇署又當睇唔到？即係點？當默許？抑或「改建車庫當樓賣」係依家香港解決房屋問題「新方法」？

毛孟靜有特權？

話說毛孟靜一家早於2010年已被傳媒踢爆喺其車庫加建圍封牆同門窗，成為一間可供居住嘅「車位住宅」，到依家都仲未清拆，原來呢種情況並唔罕見，網媒《港人講地》近日查證，毗連毛孟靜一家「車位住宅」，由另一業主擁有嘅車位，被人以同樣方法改建成另一間「車位住宅」；更甚者，該處自1985年起已當作住宅易手8次，可謂「有價有市」，最新一手「業主」舊年6月以680萬元購入該「單位」。囍雨喺度諗，呢種「車位僭建單位」係咪富人專利、專有生財之道呢？

但問題嚟喇，點解屋宇署唔執法？如果話「唔知情」，根本講唔通，據聞毛孟靜嘅僭建單位已經存在咗35年，單單係被媒體曝光都已經十年，屋宇署偏偏就係當睇唔到，唔處理單嘢。依家僭建嘅隔離，又有僭建，而且過去35年已經「交易」咗8次，屋宇署又扮唔知？囍雨想問下，究竟係屋宇署唔想得罪攬炒派政客、免得惹麻煩？定係對富有人家「格外開恩」、令毛孟靜同佢嘅「鄰居」有特權？

釀出意外 誰來負責？

的確，僭建「唔係殺人放火」，但唔等於咁就可以接受、等於冇意外風險。講真，一間僭建出嚟嘅「房屋」，內裡有咩「乾坤」，大家唔知；有冇防火設施、係咪符合規例，都冇人知，如果有人長期居住，萬一因為結構風險導致傷亡，到時邊個負責？更何況，依家仲有人「買賣」，呢種交易又係咪受到法律保障，囍雨相當有懷疑。

所以囍雨喺度呼籲屋宇署唔好再避再拖，唔好再懈怠、懶政，請馬上執法處理違規僭建，否則，可能好多人都會同囍雨一樣反問屋宇署，如果我去淺水灣買個車位、僭建間屋嚟住，然後「補地價、交差餉」又得唔得？更何況，囍雨相信，只要屋宇署依法辦事、揸正嚟做，毛孟靜等人都唔會反對嘅，因為佢哋不嬲都好反對「選擇性執法」，所以屋宇署千祈唔好因為涉及攬炒派政客就「特別對待」。

原圖：港人港地圖片、rthk

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk