「不忘初心 靜候來時」、「願香港人能夠在寒冬裏保持初心，靜候必定出現的曙光」，單單睇以上文章標題或者內容，廣男開頭以為係啲前線暴徒或者戴耀廷「寫文章」，睇真啲，原來係民主黨主席胡志偉撰文叫「同路人」保持初心。對於胡志偉呢種做作嘅「語言偽術」，廣男首先想講，唔好扮自己同啲抗爭者「同行」啦，由黑暴運動至今，廣男除咗喺新聞見過一次胡志偉喺抗爭現場講咗句「我要見指揮官」之外，其他時間，胡志偉似係食人血饅頭咋喎！依家要辭職，先嚟「扮晒嘢」，會唔會遲咗啲？

與戴耀廷一樣的口吻

如果單純睇內文，廣男想講胡志偉所講嘅嘢，同戴耀廷寫嘅文章「非常相似」，當中例如有「全國人大常委會於今年11月11日訂立取消立法會議員資格框架，正式宣布一國兩制的死亡」、「就算街頭戰線已難以持續，但我們仍然可以在日常生活中鼓起勇氣，憑良心做事，維持反抗專權的力量」、「就算國際戰線充滿不確定性，但香港人仍然可以把握每個機會，以行動向國際社會展示專權政府的荒謬」，但呢個寫法同胡志偉以往說法完全唔同，點解會咁？因為佢無咗立法會議員份工同份糧，依家玩「變臉」！

先講四名攬炒派議員被DQ一事，四人勾結外力、「促進」外國制裁香港，大家要先問下胡志偉，幾個賣國賣港嘅政客，敢問胡志偉，佢哋有咩資格當議員？符合效忠特區、擁護《基本法》嘅要求咩？如果要講「一國兩制」，DQ破壞「一國兩制」嘅政客，絕對係應有之義！

民主黨成激進派 與國家「割席」？

另一個問題，就係廣男見到胡志偉喺文章稱「大國崛起已經變成自由世界的威脅，促成新的國際關係格局」、「憑良心做事，維持反抗專權的力量」，呢種明顯係對自己國家有敵意甚至係抹黑嘅批評，係咪民主黨嘅官方立場？如果係，請胡志偉講清楚！如果民主黨要變成反中亂港嘅激進派，又連自己國家都攻擊、抹黑，廣男覺得民主黨有種的話，佢哋嘅黨員可以後都唔參選立法會、區議會，唔好一抹黑又要一邊走入體制、「守護糧支」咁肉酸。

若然胡志偉今日仲喺議會，廣男相信佢唔會講呢啲嘢。有人話胡志偉喺黨內已經表明唔會再參選，呢個可能係佢講嘢「咁放」嘅原因，但廣男想講，民主黨真係要走激進路線、誓死反中嘅話，咁民主黨「滅黨」就唔係因為總辭，而係因為民主黨有領袖「走火入魔」！

圖片來源：RTHK

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk