攬炒派許智峯、朱凱廸同陳志全因為喺立法會「潑臭」被捕，《生果報》就有報道稱「政府清算泛民」，並引述毛孟靜指今次係一次政權滅聲行動，眼見當局接二連三拘控泛民，佢認為係「清算行動」，相信政權要嚇窒民主派人士，以達致「滅聲」效果。對於毛孟靜以至《生果報》嘅說法，囍雨要先問一句，攬炒派政客如果涉嫌犯法，係咪唔拉得？

有人犯法 就要執法

根據《生果報》嘅報道，除咗「潑臭三人幫」被捕外，其他攬炒派立法會議員或者「前」立法會議員包括胡志偉、黃碧雲、尹兆堅、林卓廷等都有被捕。呢班攬炒派政客所涉案件，有啲係喺議會發生，有啲就喺議會外發生，而囍雨只係想講一點，有人犯法，警方就要執法，如果因為攬炒派政客身份而唔執法，咁就有違法治精神！

睇返相關案件，喺議事廳發生嘅案件，囍雨想講《特權法》無賦予「權力」俾議員喺立法會搞事、搗亂議會秩序；就算《特權法》當中有保護議員嘅條文，但都要保障其他議員開會、做嘢嘅合法權利呀？如果做議員唔議事而係搞事，咁被捕、被檢控，又可以怪邊個？

囍雨留意到，《生果報》仲有報道林卓廷同許智峯喺去年7月一個屯門遊行中，涉及妨礙司法公正及不誠實意圖取用電腦嘅案件；囍雨又想問下，如果林、許涉嫌有份逼市民刪除手機資料，係咪完全無罪嫌？咁警方執法，係咪應該拉晒、告晒所有涉案者，而就係唔拉、唔告林卓廷同許智峯？

法治不是這樣子

法治，就係不論邊個犯法，執法者就要執法，如果攬炒派政客認為自己係清白，好簡單，喺法庭上抗辯，等法庭還自己一個公道；依家話自己陣營被「清算」，係咪想借公眾壓力影響審訊先？仲有一點，就係以前喺議會玩衝擊「無事」，唔代表依家、以後都一定「無事」，尤其係社會、執法者對黑暴運動、攬炒派已經忍無可忍，點解仲要驚佢哋而唔執法呢？ 

圖片來源：文匯報

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk