因為要「守護糧支」，所以一班攬炒派立法會議員不惜違背民意，作出延任立法會一年嘅政治決定；可惜，因為四名擺明勾結外國勢力嘅攬炒派議員被DQ，一班表面上要「捍衛尊嚴」嘅攬炒派議員就玩總辭。玩總辭、「扮型」，係要付出代價嘅，放棄立法會議席，即係每人每月最少放棄十萬元薪金。廣男見到，無咗立法會份工嘅林卓廷，就喺社交媒體「眾籌」，稱自己未來有唔少「工作」要做，請其他人「支持」佢。對於林卓廷又籌錢，廣男第一個反應係，大家係咪仲要信佢呢？

網民的精闢回應

講真，林卓廷個Facebook平台有十萬讚好，當然有人表態「支持」佢啦，不過依廣男所見，似乎嘲笑佢嘅網民都唔少，例如有網民表示「支持你眾籌呀，出面真係好多傻仔㗎」、「又呃手足錢」，甚至有人形容佢係「乞兒」。廣男就諗，如果「同路人」真係要幫，點解唔係幫「前線手足」，而要「供養」林卓廷呢？

籌款「紀錄不良」

講開攬炒派籌錢，講開林卓廷，廣男要喺度溫馨提示大家，林卓廷唔係第一次「籌錢」㗎喇！之前為咗炒作擺明無Case嘅UGL事件、抹黑前特首梁振英，林卓廷、尹兆堅等民主黨政客特登搞咗個「天下為公」嘅眾籌計劃，籌咗過200萬元，話要「追究」梁振英，結果呢？結果就係佢哋行動，加速咗各地政府還梁振英清白，而成件事嘅最大得益者，就係林卓廷、尹兆堅可以「免費」去英國、澳洲旅行！之後林卓廷仲想再籌錢搞「私人檢控」，依家林卓廷又話要「眾籌」，信唔信佢，大家真係要諗清楚！

仲有一點，林卓廷雖然將唔係立法會議員，但大家唔好忘記，佢仲係區議員嚟㗎，一個普通區議員每月人工大約有三萬幾元，人工已經高過唔少打工仔，依家林卓廷係咪嫌唔夠多，所以想「賺多啲」呢？老實講，當林卓廷強調自己有幾多單案喺身嘅時候，廣男想問下，佢所涉嘅案件，係咪想其他「手足」幫手「找數」呢？如果係，啲「手足」係咪應該都幫啲俾人告嚴重罪行嘅「手足」先？林卓廷，做咗幾年立法會議員加區議員，可能有錢過廣男同大家「多多聲」呀！ 

圖片來源：文匯報、林卓廷Facebook

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk