中央、港府噚日依法DQ四個「勾結外國勢力」嘅立法會議員，引發攬炒派「義無反顧地」以總辭相挾；一度表明自己「會收聲」嘅「法律學者」戴耀廷，又開始議政，喺社交平台宣稱，「『依法』在香港的解釋，完全背離普通法精神」云云。廣男想講，「依法」二字，由戴耀廷把口講出嚟，何其諷刺？！一個「法律學者」，就去教年輕人違法；被大學炒魷嘅「罪犯教授」，居然厚顏出嚟同大家講「依法」？戴耀廷作為「違法達義」始作俑者，今日香港咁亂，都係拜佢所賜！戴耀廷出聲之前，又有冇先搞清楚，今次中央出手，唔係因為有人拉布、點人數，而係有人不斷挑戰中央底線、勾結外國勢力甚至危害國家安全？

戴耀廷 繼續「吹」

除咗社交平台之外，廣男見到戴耀廷今日喺生果報繼續發表「偉論」，大概意思，就係勸攬炒派「調整心態、休息養傷」；「體制內」行唔通，唔代表「抗爭路畫上句號」，仲可以「走出議會培育公民社會」，然後仲話依家抗爭似陷入低潮，只係「策略性退卻」、「等到下一個時機就只會爆得更勁」…

老老實實，大家不如請戴耀廷呢位「冷氣軍事」講清楚，到咗呢個階段，仲唔叫攬炒派收手、仲想有「下一次」？何謂「爆得更勁」？即係嚟多次黑暴升級版？講真，戴耀廷吹到咁大，自己又點先？當初sell完「攬炒十步曲」，就話如果國安法殺到埋身，自己就「會收聲、唔踩界」；後來搞涉嫌違法嘅泛民初選，宣揚「35+」（立法會議席過半）攬炒大計之後，戴耀廷又「率先」話自己要返去「休息下、專注學術」。搞咁多嘢，到頭嚟除咗搞亂香港、不斷推啲後生仔去「送頭」之外，戴耀廷根本冇一樣嘢「搞得成」，呢種人，仲信佢？！

話時話，今日班攬炒派議員「冇得撈」，除咗佢哋自己作繭自縛之外，其實都要多得戴耀廷唔少。大家諗下，無論所謂「攬炒十步曲」定係「35+」大計，戴耀廷都講到明目標包括「立法會否決政府所有議案」、「特首辭職及特區政府停擺」、「西方國家對中共實行政治及經濟制裁」等等，如果有人將呢套「目標」帶入議會，兼且有埋癱瘓議會、癱瘓政府、勾結外力嘅實際行動，搞到阿爺忍無可忍、退無可退，又點可能唔出手？

中央的底線思維

平心而論，中央從來冇將議會之路「閂埋大門」，廣男敢講，中央搞得「一國兩制」，就預咗香港內部會出現各種反對聲音；就算觀乎今次人大常委定立嘅「愛國者標準」同畫下底線，其實重點，都唔係針對緊「拉布、點人數」呢啲問題。但如果攬炒派恃住手中有權、背後有外國勢力撐腰就凡事「去到盡」，不斷挑戰中央底線，甚至去到勾結外國勢力危害香港安全、國家安全嘅地步，咁有今日呢個結果，其實真係與人無尤。

至於戴耀廷，廣男覺得大家應該將佢所講嘅嘢「立此存照」，定期審視下佢係咪一次又一次地煽惑他人、煽動黑暴！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk