玩政治豪賭，如果結果係贏，往後嘅「政治生涯」會順風順水；但如果輸咗會點呢？答案就係會被封殺，過往嘅名譽、地位等等，統統都會「煙消雲散」。最近捲入造假、抹黑美國未來總統拜登醜聞嘅黎智英，肯定就係後者啦！有傳媒報道指，黎智英日前與同被稱為「禍港四人幫」嘅前政務司司長陳方安生同民主黨創黨主席李柱銘「密會」。囍雨喺度諗，黎智英到底係咪想搵埋同美國民主黨關係良好嘅陳、李「度橋」，睇下點為自己嘅「造假抹黑」醜聞「補鑊」呢？
一個勾結外國勢力的「班底」
有傳媒揭露，黎智英等人上周六前往陳方安生屋企密會，囍雨覺得當中最大嘅特色，就係參與飯局者，幾乎都有「勾結外國勢力」嘅紀錄，例如「主人家」陳方安生，上年先到過美國「拜會」美國官員同眾議院議長佩洛西；當日一同到陳方安生屋企「密會」嘅公民黨立法會議員郭榮鏗，正正就係上年一齊同陳方安生去美國嘅其中一位攬炒派政客。至於黎智英同李柱銘，相信唔駛囍雨介紹，大家都知佢哋嘅「主子」係邊個啦！簡單嚟講，呢個就係「勾結外力派」嘅一個神秘聚會。
喺《港區國安法》同疫情底下，不論是陳方安生、黎智英、李柱銘以至郭榮鏗，都唔會再隨便去美國「拜會」美國政要，因為如果涉及觸犯《港區國安法》，刑責非常之重。囍雨相信，佢哋今次聚會，除咗係「食蟹」之外，都有可能係因為黎智英「得罪」咗美國民主黨，所以一班人坐埋一齊諗點樣「補鑊」！
棋子干預主子 神仙難救
老實講，雖然黎智英近日已經轉口風，例如稱拜登處理方式獲唔少人認同，但佢作為美國反華嘅一隻「棋子」，竟然捲入懷疑造假抹黑拜登父子嘅醜聞，而且當中嘅主事者係佢助手Mark Simon，仲挪用黎智英公司嘅錢；用常理去推斷事件發展，就係拜登上場後，就算唔全面清算黎智英，佢日後仲想得到美國政府「大力支持」都好難。更重要嘅係，佢依家雖則仲係香港攬炒派嘅「金主」、「大台」兼「黨鞕」，但所謂一朝天子一朝臣，佢喺香港「反中亂港」嘅「最重要」位置，都有可能要「讓」出嚟，變成棄卒。
如果美國「主子」真係追究黎智英責任，黎智英剩下嘅，可能只係得返旗下影響力日漸消退嘅《生果報》；囍雨喺度諗，如果有一日黎智英再被捕，或者被檢控兼入罪，美國民主黨會點對佢呢個「叛徒」呢？呢排啲花生價格「真係貴」。
圖片來源：文匯報、中新社
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論