「最心痛是 愛得太遲 有些心意 不可等某個日子」，做人嘅嘢，如果愛得太遲，可以失去一段美滿良緣；如果係搞政治，轉軚「轉得太遲」，則隨時會斷送自己嘅政治前途。廣男講緊邊個，梗係捲入造假、抹黑美國總統候選人拜登醜聞嘅《生果報》老闆黎智英啦。明明一直都係硬撐現任美國總統特朗普，黎智英近日可能怕得罪美國民主黨，又轉軚稱「拜登處事方式獲不少人認同」。對於黎智英嘅「忽左忽右」，廣男想問下黎智英，你「企定、揀好位置」未呀？

「棋子」干預主人

涉嫌俾錢人寫報告且造假抹黑拜登父子，就算黎智英「割席」，講真都好難令人信服，出手嘅Mark Simon係黎智英助手，用嘅錢又係黎智英公司嘅錢，如果話黎智英「唔知」、「無份」、「無辜」，大家信唔信？由此引伸落去，黎智英作為美國喺香港嘅一隻「反中國棋子」，「棋子」調番轉頭干預美國主子，想讚拜登一兩句就擺平事件？無可能啦！

如果大家問廣男呢件醜聞嘅本質，就係Mark Simon、黎智英甚至《生果報》都落錯注，佢哋全力支持共和黨嘅特朗普連任，甚至涉及造假抹黑拜登父子；注押得重，如果輸當然亦會「輸得甘」，依家黎智英得罪美國民主黨，而共和黨都可能嫌棄黎智英，黎智英以後就肯定難有運行，呢啲玩政治最後玩死自己嘅人，大家都見慣不怪。

前有港區國安法 後有美國再封殺

依家嘅黎智英，同一年多前黑暴運動初起時完全唔同，當時《生果報》為黑暴運動最大後盾，不斷用報道、評論煽動抗爭，黎智英本人都出現過喺唔同嘅示威、遊行場合。事過境遷，依家《港區國安法》生效，黎智英涉及勾結外國勢力危害國家安全被捕，佢剩下嘅支持，其實就係得美國呢個「主子」；依家佢自己連美國都得罪埋，可以想像得到，如果日後佢出咗咩問題，美國（尤其是若拜登上場）仲會唔會大力聲援佢，極度值得懷疑。

凡事總有終結時，當初黎智英能夠成為本港攬炒派嘅「大台」、「金主」、「黨鞭」以至「操盤人」，係因為有美國喺背後全力支持佢，日後如果美國唔再支持佢，係佢咎由自取。一切一切，都係因果循環，黎智英總唔能夠一直搞局而「唔出事」嘅。 

圖片來源：中通社

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk