警方國家安全處噚日正式推出「國安處舉報熱線」，並提供微信、電話短訊及專設電郵俾市民舉報「侵害國家安全」嘅行為；據報，截至噚晚六點鐘，警方就收到超過一千個訊息，而攬炒派就紛紛攻訐熱線，包括指熱線掀起「白色恐怖」、如同「文革」云云。囍雨想講句，警方設立熱線俾市民舉報罪案，何錯之有呢？
毛孟靜的「文革論」
對於警方嘅「國安處舉報熱線」，民陣召集人陳皓桓就稱熱線喺社會掀起「白色恐怖」，港人或者唔敢再喺公眾場所表達意見；而近期再被僭建醜聞纏身嘅立法會議員毛孟靜，就稱熱線如同「香港特色的文革」，箝制社會大眾思想，令市民「自我噤聲」。講到咁嚴重，但侵害國家安全行為，唔應該被舉報、跟進咩？
講真，《港區國安法》已經立法同生效，警方設立舉報熱線，就如同其他案件市民可以報案一樣，如果市民可以舉報其他罪案，點解唔可以有熱線舉報涉嫌侵害國家安全嘅行為呢？同樣重要嘅一點，就係如果無觸犯國安法，就唔會被舉報甚至被拘捕，攬炒派政客咁「驚」，係咪怕自己或者「同路人」有以身試法？
黑暴運動才是白色恐怖
至於所謂「白色恐怖」，囍雨想大家搞清楚一點，自去年六月黑暴運動以來，「私了」圍毆市民同警察嘅，係暴徒；玩起底、欺侮、想滅人聲嘅，又係暴徒，面對呢啲真正嘅白色恐怖，點解唔見攬炒派包括毛孟靜同民陣出聲？相對之下，《港區國安法》以至警隊嘅舉報熱線，係俾人舉報罪案，點恐怖法？難道恐怖之處在於警方俾人舉報罪案？
如果無持續一年多嘅黑暴運動，其實就未必有制定國安法嘅急切性，講到底，一切都係黑暴運動嘅後果。囍雨要喺度提提大家，攬炒派政客將舉報侵害國安行為講到好似「白色恐怖」、「文革」咁，大家千萬唔好以為「表達意見」等於「講乜都得」；因為喺《港區國安法》生效下，觸犯相關法例係相當嚴重嘅罪行，大家睇攬炒派主流政客完全唔敢踩界，就知道法例唔係講笑。囍雨都係果句，唔好俾攬炒派蠱惑到，做咗爛頭卒、棄卒都唔知呀！
原圖：香港警察Facebook
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論