執筆之時，美國總統大選依然點緊票，情況膠著，雖然結果未定，但拜登似乎贏出大選機會極高。囍雨呢兩日不斷睇即時新聞，感覺只有一個字，就係「亂」！明明仲點緊票，特朗普就公開話自己贏，仲想要求聯邦最高法院停止點票；另一邊廂，拜登亦話相信自己會贏，睇到「眼都花」。難道美式民主，就係如此亂？

特朗普不尊重選舉

老實講，睇特朗普近期嘅言論，囍雨覺得特朗普唔係太尊重咁重要嘅總統選舉，一般情況下，美國總統大選候選人，都係等結果塵埃落定之際，先至會宣布自己勝選或者敗選，但點票到中途特朗普就話自己會贏，明顯會予人「打茅波」嘅感覺；而佢仲想叫停點票工作嘅舉動，囍雨更質疑，咁果啲投咗票嘅美國公民點算？因為係郵遞投票，所以自己嘅選票就要被排除？如果係咁，特朗普以至其團隊，又點可能係尊重民主同民意？

觀乎依家嘅形勢，就算拜登最後攞到超過270張選舉人票都好，佢一定唔會順利當選為新一任美國總統，因為特朗普幾近肯定會訴諸法律手段，不斷提出訴訟，質疑郵遞投票尤其係11月3日之後先寄到嘅選票，呢場總統大選，亦會由民意戰變成司法戰；之前就有分析就估計，美國會「內亂」一陣子，時間最少以月計算，如果特朗普因為保守派喺最高法院有人數優勢而得到「甜頭」，咁美國嘅選舉制度，肯定會受到動搖。

內部撕裂 動亂不絕？

根據傳媒報道，大選未點完票，美國全國多地已經爆發示威，德州達拉斯、紐約、俄勒岡州都有示威，要求官員點算「每張選票」，其中紐約已經爆發警民衝突，而明尼蘇達州亦有幾百名示威者遊行反被警方包圍。可以預計得到，不論係特朗普定係拜登勝出，另一邊嘅支持者都會借機生事，「美版黑暴」重演，係可以預見嘅事實。

對於民主，有人話係普世價值，亦有人話縱使佢有「千千萬萬個不是」，但佢起碼比機會市民去選個新嘅領袖，但囍雨想問，如果有人「輸打贏要」，唔承認選舉嘅結果又如何呢？民主雖好，但如果係有用心不良嘅政治領袖「反民主」，咁國家內部撕裂以及動亂不絕，就必然發生！

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk