早前壹傳媒老闆黎智英助理Mark Simon被揭發，用黎智英嘅公司錢去搵人捏造虛假報告，抹黑美國總統候選人拜登兒子，企圖操弄美國大選。由於《生果報》老闆黎智英捲入造假風波，《港人講地》記者早前就追問咗幾位攬炒派議員，包括民主黨涂謹申同公民黨譚文豪等人，睇吓佢哋對事件同有咩睇法。點哋佢哋面對記者提問，單止態度閃避，甚至裝傻扮懵，死口話對事件「無認知」。唔通佢哋因為唔想得罪金主兼「大台」黎智英，所以寧願封口、講少句當幫忙？
造假報告會否不止一份？
黎智英助手等人涉嫌造假，唔少人都有同一疑問，到底《生果報》以往一系列嘅報道，係咪真係信得過？例如早前《生果報》報道「12瞞徒」事件，就引述過由之前抹黑拜登嘅同一機構所做嘅調查結果，聲稱有航空數據指，一眾瞞徒被捕當日，飛行服務隊派定翼機監察，仲話有遠洋輪或許目擊事件。咁《港人講地》記者追問涂謹申，認唔認為有關報告有機會造假，怕唔怕自己被誤導。點知涂謹申嘅回應相當有趣，話相信飛行服務隊嘅數據係真，自己對事件好清楚。廣男想問，點解涂謹申對擺明造假抹黑拜登嘅機構咁有信心？
涂謹申嘅答法，只係話信飛行服務隊嘅數據係真，係咪佢都唔認為報道嘅其他內容係真？依家黎智英助手Mark Simon被踢爆做假，佢自己都認埋衰道歉，仲要辭職離開壹傳媒撇清關係。既然捏造報告已經有前科，咁「12瞞徒」報告係咪真確，相信報道嘅《生果報》都心知肚明！好心涂謹申就咪死撐啦！
不清楚還是扮唔知？
《港人講地》記者另外仲有訪問譚文豪，被問到黎智英涉「假報告」醜聞時，譚文豪只係不斷話「無認知」，足足拖足4分鐘都唔肯正面回應，仲向記者發脾氣，問對方係咪讀傳媒出身。廣男想講，譚文豪日日睇《生果報》，經常喺社交媒體轉貼佢嘅新聞，依家發生咁大件，都話唔知咩事？你係咪扮唔知先？如果明知又肯答，係咪想一心護主？譚文豪唔答問題都算啦，反問記者學歷有咩意思，同提問有咩關係？做咩要扯到咁遠？
除咗譚文豪以外，其他攬炒派嘅態度都係差唔多，例如毛孟靜就話唔知道，黃碧雲就話唔回應。其實廣男都明白嘅，造假事件斷到正，攬炒派政客又的確係幾難幫黎智英解釋嘅，但如果諗住唔提或者扮無知，就可以幫到金主解圍，會唔會係天真咗啲？
圖片來源：RTHK
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論