之前有小學教師因為喺教材上「播獨」，被教育局釘牌，攬炒派包括教協出盡九牛二虎二力想保住教師，近日又有攬炒派議員喺議會上就事件質問教育局，其中民主黨立法會議員黃碧雲更批評教育局局長楊潤雄「不明白學術自由及多角度思考的意義」，囍雨想問下，散播「港獨」思想或者討論「港獨」，係咪學術自由嘅一部分呢？

楊潤雄：「港獨」無討論空間

喺噚日一個立法會會議上，其實楊潤雄已經表明，校方應向學生解釋「港獨」在港非法、在校內無討論空間，又批評部分有心人唔應該濫用學術自由或言論自由名義「播獨」，不過黃碧雲就話楊潤雄唔明白學術自由同多角度思考，囍雨反而要質疑返黃碧雲，犯法嘅事，黃碧雲想點討論呢？

說起「港獨」，喺未有《港區國安法》前，「港獨」已經明顯違反咗《基本法》規定，有違香港係中國不可分離的部分嘅大原則，喺呢個前提底下，學校同學生討論，繼而得出「港獨」結論，咁點算呢？至於有咗《港區國安法》後，宣揚「港獨」更加係犯法，而且係重罪，討論「港獨」分分鐘變「播獨」再變犯法，當全香港都唔應該討論、「宣獨」時，學校自然亦無討論空間。

學術自由非無界線

至於學術自由嘅問題，囍雨認為同言論自由一樣，都係有界線嘅，學術上嘅討論，會唔會、有冇必要討論違法嘅事呢？舉個例，暴徒「打砸搶燒」、私了無辜市民，如果當做學術討論，喺課堂上討論「下次示威」點樣打市民同縱火最好，應唔應該？算唔算煽動違法？囍雨無記錯嘅話，黃碧雲係喺大學教過書嘅，一個「學者」，唔知道學術自由唔係「大晒」？

其實講到底，攬炒派想「港獨」問題上「廣開言路」，如果唔係自己都有「獨心」，就係想靠害，等人以為討論甚至「宣獨」都無問題；但囍雨請大家諗下，如果無問題，點解班政客自己唔講、唔討論？因為有刑責㗎嘛！犯法、要承擔罪責嘅嘢，攬炒派政客梗係留俾啲「傻仔」、「傻女」做啦，對於佢哋而言，最緊要就係「守護糧支」！ 

圖片來源：RTHK、網上圖片

請Follow我們的YouTube頻道：https://bit.ly/2kgU8qg

下載我們的手機應用程式，收看第一手精彩內容：https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk