前公民黨成員兼前立法會議員陳淑莊同「香港中小企食店聯盟」召集人林瑞華早前喺酒吧有場稱為「開會」嘅40人聚會，事後不論是陳淑莊定係林瑞華，都受盡各方抨擊，陳淑莊等人以「私人地方」、「開會」等理由作辯解，但公眾似乎都唔係太信服。今日囍雨睇新聞，見到林瑞華已經公開表示收到法庭傳票，指控佢同友人分別違反限聚令同相關抗疫規定，將於明日出庭應訊（據報陳淑莊及張秀賢一同被告）。囍雨唔會評論有關違反限聚令嘅指控，但想指出，如果佢哋呢場係一場關乎選舉、又涉開支嘅活動，可能就唔止涉及違反限聚令咁簡單。
政客無特權
對於林瑞華被控，囍雨首先要指出，姑勿論佢係食店聯盟嘅召集人，定係政黨代表都好，如果佢真係有犯法，不論其身份，不論其背後有幾多律師黨友「撐腰」，都一定要承擔罪責。攬炒派經常有種論述，就係以政客身份行事好似「實無事」咁，但囍雨想講，喺法律面前，政客唔會有特權。
今次林瑞華被控違反限聚令或抗疫規定，囍雨留意到《生果報》報道稱，「法例同時訂明，參與或組織聚集的人，如擁有、控制或營運進行該聚集的地方，及明知而容許該聚集進行，一經定罪，可處罰款25,000元及監禁6個月」，囍雨好奇，如果林瑞華一行人當時實際控制緊佢哋「聚會」嘅酒吧，最高刑罰係咪唔止可以罰款，而係可以判監呢？
有涉及選舉法例嗎？
事實上，呢個「酒吧聚會」嘅「謎團」梗係唔止咁少啦，之前囍雨已經寫過，陳淑莊、林瑞華同元朗區議員張秀賢等人聚會當晚，係立法會飲食界功能組別更新選民資料嘅限期，張秀賢喺事發前幾日又喺元朗同林瑞華疑似做選民登記，如果林瑞華當晚係傾選舉，而且涉及到有人飲酒、食嘢而「有人埋單請飲酒」，咁就可能唔止關限聚令事，而係涉及「選舉舞弊」嘅相關法例。囍雨果段時間留意相關新聞，似乎無人解到佢哋當時有冇傾選舉，有冇人「請飲酒」，執法部門應該可以繼續跟進。
姑勿論林瑞華等人最後控罪成立與否，喺限聚令底下一行幾十人喺酒吧飲酒「傾計」，觀感肯定唔好；而由頭到尾，囍雨都唔覺林瑞華有公開道歉過，佢嘅政治承擔有「幾大」，大家應該「感受得到」。其實成件事，包括警方搜查時「搵唔到」閉路電視片段、閉路電視品材內無硬碟、當事人被質疑講大話等，仲有唔少疑團未解，希望執法部門可以迎難而上，追查到底。
圖片來源：林瑞華社交網頁
請Follow我們的YouTube頻道：https://bit.ly/2kgU8qg
下載我們的手機應用程式，收看第一手精彩內容：https://www.speakout.hk/app
評論