以前睇一套經典港產笑片，有句經典對白：「呢區最大就係我，你要port（投訴）我就嚟我面前嚟port我啦！」睇電影，大家會「會心一笑」；但如果發生喺現實生活，真係「得個喊字」。
就住近期唔同個案，香港嘅問題教師、問題教材事件越揭越多，以至令社會上唔少聲言都呼籲，香港都應該效仿英國、澳洲等地方，建立專責、有效處理涉及教師專業操守投訴嘅機制。唔講唔知，原來香港早喺1994年，已經成立「教育人員專業操守議會」（下簡稱「議會」），其主要職能之一，就係「就涉及教育工作者的糾紛或指稱行為失當個案，向教育局常任秘書長提供意見」。但有媒體近日翻查過去十年（2008至2019年）嘅公開記錄發現，該會處理教師操守投訴62宗，竟然錄得「零成立」；如果細分，你甚至會睇到：「經聆訊後指控成立」0宗，「經聆訊後指控不成立」0宗，「經聆訊後雙方同意和解」0宗，「投訴不立案」23宗，「投訴不受理」4宗，「無法跟進」1宗...
十年間 「零成立」
一般嚟講，「零成立」當然係好事；但今時今日喺香港，「零成立」真係等於冇失德教師？單單睇番修例風波爆發以嚟呢一年多，香港教師隊伍中，公開宣揚「黑警死全家」者有之，以「警察子女過唔到7歲」、「死於非命」等冷血言論煽動仇恨、欺凌者有之，篡改歷史抹黑國家者有之，更甚者，以教案「有計劃地」宣傳「港獨」綱領、乃至當場要學生表態者，亦都有之！講真，好多投訴個案，如果唔係因為當初有家長爆料、有媒體追查，全港市民都未必知道咁多。當鐵一般嘅事實擺喺眼前，大家再嚟審視「十年間投訴零成立」呢個驚人數據，自然要質問一句，究竟真係「冇投訴成立」？定係冇人認真、秉公處理過相關投訴？！
廣男就話，只要大家睇下呢個「教育人員專業操守議會」係由咩人組成，大概就會明白當中古怪。以2017至2019年度為例，28名議會成員中，由教協支持參選或代表教協出選者有12人，7名執行委員中，5個係教協成員。再以最新呢屆（2019至2021年度）為例，情況更誇張，除咗繼續有5名教協成員把持執行委員會大多數之外，有教協背景嘅成員多達14人。
自己人查自己人？
即係話，成個「教育人員專業操守議會」，一半都係教協「自己友」；試諗下，喺咁嘅情形下，如果有人上門投訴「有教師涉嫌違反專業操守」，跟住落嚟嘅畫面隨時係：接投訴嘅係自己人、查投訴嘅係自己人、最後扑槌裁定「投訴不成立」嘅，都係自己人。大家睇通透未？即係等於，你想port我啲人？呢度我最大，要port就嚟我面前port啦！
廣男覺得，當一個本來應該監督「教育人員專業操守」嘅組織變成由教協把持，今日香港教育嘅崩壞、失德教師嘅有恃無恐，全部都可以話係「有原因」、有跡可循嘅；事實同數據都清楚話俾大家知，所謂教協，根本就係包庇「所有教師」；廣男建議教協唔應該再話自己係「專業人員」組織，應該改名叫「專業包庇失德人員工會」。
原圖：rthk
請Follow我們的YouTube頻道：
下載我們的手機應用程式，收看第一手精彩內容：
評論