國泰航空大裁員，單單係本地就要解僱超過5,900名員工，而旗下嘅國泰港龍更加要即時停止營運。如果大家面對「倖存」嘅國泰員工，佢哋要決定係咪簽新合約，你會比咩建議佢哋？出於「保就業」嘅考慮，囍雨一定會叫佢哋簽，因為喺呢個時勢，要再搵工係非常不容易；不過，港龍空勤人員協會前主席施安娜，就質疑新合約未能保證國泰唔會再裁員，呼籲其他人「不要簽新合約」。呢種寧死都要「反抗」嘅做法，算唔算係「二次攬炒」？

誰能保證不裁員？

對於施安娜嘅呼籲，囍雨第一個反應係，佢講嘅嘢根本就唔make sense，點解咁講？國泰航空喺疫情底下生意大減，之前需要政府注資先可以營運落去，喺疫情未明朗、航空業唔知幾時可以恢復原狀嘅情況下，國泰仲支持到幾耐都好難講，請問施安娜點解覺得國泰可以保證「不再裁員」？佢提出要求或質疑之前，係為反而反，定係真心想攬炒？仲有，依家「大灣區航空」可能招聘人手，施安娜又預料同事未必適應或喜歡果種文化，稱「我們不想服務一個內地的…什麼皖魚、魚生…大灣區是不是要吃這些？」，感覺上，施安娜似係想啲舊同事失業多啲喎！

施安娜想攬炒國泰或者航空業，都唔係今日先發生嘅事，今年年初，疫情初起，施安娜就醞釀、想搞罷工，當時佢搞咗個「不和你飛」集會，明言如果公司航班唔停飛內地，就不排除發起工業行動；大半年後嘅今日，內地已經控制好疫情，經濟活動開始恢復，而以往返內地航班為主嘅國泰港龍，唔夠夠復飛內地，最終停止營運，囍雨認為，如果香港可以同內地恢復經濟民生交往，今日國泰港龍都未必要停運，施安娜等人到今日仲想玩攬炒，似乎仲未睇清楚形勢。

別被施安娜「陷害」

施安娜作為一早已經被國泰解僱嘅人，其他員工簽唔簽新合約，基本上都唔係好關佢事；囍雨喺度奉勸各位國泰員工，如果要聽施安娜等人嘅「呼籲」，係可以嘅，但最後要承擔咩後果，例如無咗份工，唔係施安娜無咗份工，而係你哋自己無咗份工。前空姐吳敏兒無咗份工，可以成為職工盟主席，但有幾多航空業人員可以有吳敏兒咁幸運呢？玩罷簽、玩政治，事敗可能會輸咗份工，甚至連前程都輸埋，大家真係要小心！

攬炒派成日話要攬炒，其實到咗真正攬炒一刻，根本不論是僱主還是打工仔，統統都係輸家，今日見到施安娜仲喺度興波作浪，佢到底係為人好，定係想人失業？ 

圖片來源：RTHK、新華社

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk