政府放寬本地遊行團30人同遊，而組織遊行示威則仲未能夠豁免，民陣立即批評維持限聚令做法荒謬，質疑係借疫情「打壓示威」。其實，依家喺香港Keep住都有零星嘅本地感染個案，有啲仲要係源頭不明；如果喺呢個時候放寬遊行集會等示威活動，萬一喺示威現場有疫情傳播，咁咪變相香港即刻出現第四波疫情？民陣想遊行集會，但有冇諗過香港人嘅生命健康？

經濟 VS 政治

如果單純睇民陣代表嘅言論，好容易有種感覺就係「你俾人搞本地遊，但唔俾人遊行係荒謬」，但廣男首先要指出，本地遊同遊行集會兩件事，根本係唔可以單純地比較；前者講嘅係，係業界人士嘅生計，旅遊業人士已經瀕臨崩潰，如果少少放寬措施都無，點開飯，點養家？至於遊行、集會，民陣以至攬炒派可能覺得好緊要，但暫時唔搞遊行、集會，唔會影響到民陣等人嘅生計嘛？唔通攬炒派趕住搞遊行集會去籌款，所以無遊行集會唔得？定係，佢哋將政治視為生命，生命中唔可以無得遊行同集會？

一個極為重要嘅問題，就係廣男近日睇新聞，近期確診個案雖然係有減少，但一啲日子嘅確診數字，本地確診個案依然存在，而且有啲個案仲要係源頭不明；大家試想下，如果俾民陣搞遊行，而有患者帶住新冠病毒參加遊行，之後患者證實確診，政府要隔離幾多人先夠？人數眾多嘅遊行集會，又有幾多人可能會染疫？

坦白講，政治活動唔同經濟活動，經濟活動唔進行，相關嘅業界人士就可能會無飯開，但政治活動例如遊行集會，就算因為疫情唔搞住都唔會阻礙到任何人嘅生計；又或者，民陣要發聲，仲有其他公開渠道可以做。但係，喺疫情之下仲想搞遊行集會，漠視公共衞生，廣男就覺得一定唔得。

怕自己不能搞局？

其實民陣嘅紀錄咁差，不時遊行集會後都出現暴徒打砸搶燒嘅場面，假若有日疫情受控而民陣要搞遊行集會，廣男覺得執法部門都要嚴格把關；至於民陣本身，係咪無得搞遊行集會，個組織就Run唔到？如果係，民陣咪即係剩係識「搞局」？ 

圖片來源：民陣Facebook、RTHK

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk