之前有人謊稱有被捕人士喺新屋嶺被性侵、殺害，煽惑他人包圍新屋嶺，結果被捕、被檢控兼被定罪。講開性侵，大家都會認為係一件人神共憤嘅事，不過，最近一名潛逃到德國嘅中大女學生獲得德國批出難民身份，據傳媒報道，呢位中大生聲稱被難民營職員性侵，但在訪問中「感謝德國政府對她批出庇護」，囍雨覺得，面對刑責，最好就係勇敢面對，如果真係潛逃在外而令自己被性侵，其實係唔係風險更大呢？

道德之人何在？

囍雨仲記得，之前喺台灣，已經發生過有「手足」涉嫌性侵「女手足」事件，引發廣泛討論，依家如果真係又發生呢啲事，其實都令人幾無奈。而計正嚟講，有「女手足」如果真係被性侵，各方黑暴人士應該對性侵者、單位以至地方政府口誅筆伐嚴厲譴責先啱，但好奇怪，囍雨睇唔同新聞以至網上評論，好似無人譴責過德國政府喎，到底係出於咩原因？係因為對方肯收留香港黑暴人士，所以其人員「胡作非為」都唔可以批評？呢種「唯外國勢力都是對的」嘅諗法，又係咪雙重標準？

不是難民 是逃犯

講返庇護呢件事，囍雨亦要不厭其煩地講句，不論是今次嘅中大女生，抑或係之前已經潛逃德國嘅黃台仰同李東昇，佢哋都唔係難民或者政治犯，而係喺香港涉嫌犯下刑事罪行、棄保潛逃嘅逃犯；德國批出庇護予呢名中大女生，予人觀感就好似佢喺香港受政治逼害咁，但事實係佢係喺香港涉嫌犯法，咁樣得到外國庇護，應該係外國出於政治理由而破壞香港法治先真。

據傳媒報道，呢名中大女生係黑暴運動後德國首次向黑暴示威者批准難民申請，喺呢度，囍雨真心覺得外國勢力或者外部勢力，要睇清楚香港嘅黑暴運動，到底發生咩事。持續超過一年嘅黑暴運動，唔係咩和平示威，亦唔係和平地表達訴求，唔少暴徒走上街頭打砸搶燒，甚至有無辜市民喺街頭被暴徒殺害，今日德國向黑暴分子批出庇護，算唔算係另類嘅支持黑暴方式？所謂己所不欲，勿施於人，如果有德國逃犯逃到香港，囍雨都唔相信德國政府想香港「保護」逃犯。

成件事，如果用一個較闊嘅角度睇，就係西方國家開始想打擊中國，關於香港嘅黑暴運動，成為咗一個「切入點」，暴徒用暴力，外國勢力撐；暴徒出走，外國又接收，咁樣算唔算係一種干預？如果民主國家唔講法理，呢種民主，令人懷疑。 

請Follow我們的YouTube頻道：

https://bit.ly/2kgU8qg

下載我們的手機應用程式，收看第一手精彩內容：

https://www.speakout.hk/app

瀏覽我們的IG：https://www.instagram.com/speakout_hk/?hl=zh-hk