出名「勇猛」嘅民主黨立法會議員許智峯，曾經因為喺立法會強搶女政府人員手機而「出名」，計及之後喺議會嘅衝擊搗亂行為以及喺街頭支持「黑暴」，更令佢成為民主黨中罕有嘅「勇武派」。近日立法會發展事務委員會選正副主席時，許智峯喺會上從票箱搶去幾張選票，立法會秘書處報警處理，許智峯就回應係「小題大做」、「以警權威嚇及打壓議會抗爭，做法可笑」。廣男真心唔明白，乜原來搶嘢係小事？難道許智峯已經成為「慣犯」，所以搶嘢已經變得係「小事」？
議會抗爭非任意妄為
許智峯對會議程序有意見都好，廣男覺得係一件事，但佢搶嘢，好明顯又係另一回事，如果「有不滿」就做乜都得，咁議會一定會無晒秩序，所以所謂「議會抗爭」，絕對唔係一個「犯事理由」；再者，許智峯嘅行為，可能已經觸犯咗立法會嘅《特權法》。
根據《立法會（權力及特權）條例》第17條嘅〈藐視罪〉，凡任何人喺立法會或任何委員會舉行會議時，引起或參加任何擾亂，致令立法會或該委員會嘅會議程序中斷或相當可能中斷，即屬犯罪，可處罰款$10,000及監禁12個月；而根據第19條，凡任何人襲擊、干預、騷擾、抗拒或妨礙任何正在執行職責嘅立法會人員，即屬犯罪，可處罰款$10,000及監禁12個月。廣男就咁睇，許智峯罪嫌都相當大下，警方一定要依法辦事，唔可以輕輕放過許智峯。
還有國安法呢
除咗立法會嘅《特權法》，廣男想喺度提提大家（包括攬炒派議員），喺《港區國安法》生效之下，嚴重干擾、阻撓、破壞中央政權機關或香港特區政權機關依法履行職能，即屬犯罪，許智峯咁做會唔會涉及觸犯《港區國安法》，廣男就唔肯定；但如果佢同佢啲「同路人」都用呢種手法阻礙議會運作，會唔會違反《港區國安法》真係好難講。
不過，話說回來，自從《港區國安法》立法同生效之後，成班攬炒派議員好似好「斯文」咁，噚日搶選票嘅許智峯，其實無咩大動作，其他攬炒派議員，更加係「坐定定抗爭」，之前有人估計攬炒派議員延任後會有「激烈抗爭」，真係「激到」呢，唔攞放大鏡、將個電視喇叭教大聲啲，都爭啲睇唔到佢哋「激烈抗爭」呀陰公！
原圖：大公報
請Follow我們的YouTube頻道：
下載我們的手機應用程式，收看第一手精彩內容：
評論